Стојков, ВМРО-ДПМНЕ: Кочани не доби гас, ниту старечки дом, ама градот го доби хотелот на градоначалникот
Резултатот од владеењето на СДСМ е сиромаштија, криминал, зголемени цени на производите, масовни отпуштања од приватниот сектор, празни ветувања. Време е да си заминат - рече Стојков.
Пред неполни четири години градоначалникот Николчо Илијев со слоганот ,,Живот во Кочани за сите’’ ја презентираше својата политичка програма со ветувања за капитални инвестиции во овој град на Истокот. Денеска сите ние сме сведоци како тие ветувања останаа само на хартија, со лукративна цел, само да се седне на градоначалничка фотелја, рече Мирче Стојков, претседател на ОК на ВМРО-ДПМНЕ во Кочани.
– „Гасот е еден од најевтините но и најеколошките енергенси воопшто, а гасификацијата на Кочани е еден од клучните проекти за развој на општината“ – ова е сегмент од неговата политичката програма. Рокот за отпочнување на проектот е предвиден 2018 година, а во 2021 година останува енигмата дали воопшто се предвидени пари од општината потребни за техничката документација за гасификација како почетна фаза. Изградба на Старечки дом „згрижувањето на пензионер“, исто така беше негов адут со кој буквално ги излажа граѓаните за да ја добие нивната доверба. Освен пензионерите, ги излажа и професионалните актери, дипломирани режисери, културни дејци, на кои им беше ветено дека Кочани ќе добие повторно професионален театар. Изостана и реконструкција на градскиот стадион Никола Мантов, ветување кое требаше да го реализира заклучно во 2019 година – рече Стојков.
Како најголем проект во овој тековен мандат, додаде тој, ќе остане во меморијата на кочанчани, пренамената на објект во центарот на градот, кој популарно меѓу народот е наречен ,,Хотелот на градоначалникот“.
– Во време на ВМРО-ДПМНЕ, Кочани доби две директни странски инвестиции кои даваат егзистенција на 3.000 семејства. Во време на СДСМ, нема ниту една инвестиција, ама затоа има илјадници отпуштени работници од приватни компании. Сиромаштијата го зголеми степенот на криминал во градот, кој пак од друга страна предизвика етнички тензии, недоверба во институциите и масовна миграција. Локалната власт се прави глува на зголемената стапка на криминал, иако граѓаните буквално молеа да се реши безбедносното прашање. Резултатот од владеењето на СДСМ е сиромаштија, криминал, зголемени цени на производите, масовни отпуштања од приватниот сектор, празни ветувања. Време е да си заминат – рече Стојков.