Стојанче Ангелов: Не загина ниту еден човек, дрвјата ќе пораснат, треба ли да ги ризикуваме нашите пилоти?

Само еден хеликоптер беше на располагање синоќа, од мене беше побарана употреба на хеликоптер од градоначалникот на Кочани, но хеликоптерот веќе беше во функција во Старо Нагоричани, изјави Стојанче Ангелов, директорот на Центарот за управување со кризи (ЦУК) на денешната прес-конференција.

– Хеликоптерот делуваше на терен кој е тешко пристапен за цистерните, додека пожарот во Кочани можеше да се контролира од земја. Македонија е земја со ограничени ресурси, ние тоа треба да го сватиме тоа – рече Ангелов според кого хеликоптерот е лимитиран ресурс за време на летните горештини, бидејќи машината може за кратко време да се прегрее и да се случи катастрофа.

Тој објасни дека силниот ветар со голема брзина одеднаш синоќа го проширил пожарот во неколку различни правци, а во тој момент имала само еден расположлив хеликоптер.

Ангелов објави дека по разгледување на актуелната состојба едногласно Кризниот штаб  одлучил дека нема потреба од прогласување на кризна состојба, но може одлуката за брзо да се промени.

– Оваа одлука е затоа што претседателот Стево Пендаровски даде наредба за употреба на армијата. Воедно и каналите за меѓународна помош се отворени и добро функционираат – рече Ангелов кој рече дека голем проблем при синоќешниот пожар била и паниката што ја предизвикувале политичарите.

– Паниката убива, тоа никаде не не носи, не е така како што некои реагираа на социјалните мрежи. Никој не е повреден, јас сум горд на синоќешната акција – рече Ангелов кој најави дека за евентуална оставка ќе размислува кога ќе залади и откако ќе се направат анализи.

– Вчера не изгоре ниту еден човек. Навреда е тврдењето дека ЦУК не презел ништо. Ние и повеќе од тоа направивме. Дали за нечии болни амбиции треба да ги ризикуваме нашите пилоти? Дрвјата повторно ќе пораснат, ќе ни се вратат. Важно е дека спасени се човечки животи – рече Ангелов.