СТАВИ, ВАДИ, СТАВИ Вратен знакот „Ја сакам Кисела Вода“, на потег е Данела (ФОТО)

Градоначалникот на Кисела Вода Орце Георгиевски утрово на својата фејсбук страница сподели дека на пешачкиот остров меѓу улицата Народни херои и булеварот Борис Трајковски пак е вратен знакот „Ја сакам Кисела Вода“, кој пред 4 месеци го урна градоначалничката на Скопје Данела Арсовска.

Битката помеѓу Градот и Општината околу „Ја сакам Кисела Вода“ тогаш заврши со „победа“ на Град Скопје“, а сега со овој потег на Ѓорѓиевски „резултатот е изедначен“. Градот тогаш донесе решение за отстранување, за кое градоначалникот рече дека е правно неиздржано поради тоа што во него, случајно или не, се бара отстранување на објект во Општината Аеродром, а не во Кисела Вода.

– Да водиш институција е многу сериозна работа и тоа не подразбира реваншизам, политичко инаетење и незрелост или правење на циркус со рушење на рекламни табли. Тоа подразбира решавање на проблеми на граѓаните и искрено се надевам дека дотичните од Градот Скопје ќе излезат од балонот  на гнев и реваншизам и конечно ќе ја сфатат улогата и функцијата за која се избрани – изјави тогаш Ѓорѓиевски.

Георгиевски смета дека градоначалничката се вразумила и дека почнала да се занимава со многу поважни работи од знакот „Ја сакам Кисела Вода“.

Знакот беше урнат во октомври лани, откако Арсовска се скара со ВМРО-ДПМНЕ и лидерот Христијан Мицкоски. Тогаш Георгиевски најави дека тој повторно ќе биде вратен на локацијата.