СТАБИЛНИ СЕ ПАЦИЕНТИТЕ КОИ СЕ ЛЕКУВААТ ВО СРБИЈА И ВО СОФИЈА Испратиле порака „поздрав за Македонија“

Во моментов стабилна е состојбата на пациентите кои се хоспитализиртани во Србија, како и тие што се наоѓаат универзитетската болница во Софија, рекоа претставници од тамошниот Универзитетски клинички центари кои денеска во Скопје учествуваа на Првата конференција на медицински сестри од Југоисточна Европа.

Мирјана Прибичевиќ, главна медицинска сестра на Клинички центар – Србија, рече дека се донесени фотографии со поздрави од пациенти.

– Кај нас дојдоа и беа сместени 17 деца од 18 до 26 години, дел беа префрлени во Ниш. Останатите се добри, стабилни, не се на респиратор и се надеваме на најдобро. Тоа се деца на кои веќе им се прави трансплантација на кожа. Се надевам дека за две до три седмици, повеќето ќе бидат вратени. Засега, се фотографираа со порака за сите овде, „поздрав за Македонија“. Поздрав за сите од нив, но и од нас од Клиничкиот центар – рече Прибичевиќ.

Никола Петров, кој работи во болница во Австрија, универзитетска клиника, рече дека тројца од повредените од дискотеката во Кочани се лекувале во Виена, а вкупно седум во Австрија.

– Бев во контакт со родители, ги придружував додека одеа кај децата, беа добро и за кратко беа пуштени од интензивна нега, во нормално одделение – истакна Петров.

Ана Тодорова од универзитетската болница во Софија, рече дека кај нив биле однесени седум тешко повредени пациенти од Кочани, кои сега биле во добра состојба.

Гордана Драгошев од Клинички центар – Ниш и претседателка на Здружението на медицински сестри од интензивна нега во Србија, рече дека најпрвин кај нив биле однесени тројца повредени од Кочани. Сега на интензивна нега била една пациентка, за која се надева дека ќе биде добро. Двајца пациенти биле префрлени во други клиники, што значело дека им се стабилизирала состојбата.

Неофицијалните податоци на Институтот за јавно здравје, зборуваат дека сме 9.200, меѓутоа потребите според нашите стандарди се некаде на 14-15.000 медицински сестри, изјави на денешната прес-конференција Гордана Бешлиовска, претседател на Унијата што ја предводи Здружението на медицински сестри, техничари, акушерки и стоматолошки сестри „За нас“.