ССНМ, ЗНМ и СЕММ ќе им постават 10 прашања на политичките партии за новинарството
Од новинарските здруженија велат дека очекуваат политичките чинители во изборите кои се сериозни да дадат искрени одговори кои понатаму ќе можат и да ги спроведат, а со цел подобрување на слободата на изразување и независноста на медиумите во нашата земја.
Самостојниот синдикат на новинари и медиумски работници (ССНМ), Здружението на новинари на Македонија (ЗНМ) и Советот за етика во медиумите во Македонија (СЕММ) во пресрет на изборната кампања ќе упатат десет прашања до политичките партии и коалиции кои ќе настапат на предвремените парламентарни избори.
– Со години забележуваме примери на непринципиелен однос на политичарите кон медиумите и новинарите, што нѐ исправило пред дилемата: дали најголем дел од политичарите знаат каква е улогата на новинарите и медиумските работници и кое е нивното значење за демократијата? – велат од трите здруженија.
Можеби ќе ве интересира
Како што соопштија од новинарските здруженија во следните десет дена јавно ќе поставува по едно од десетте прашања: Што е за вас новинарството?
- Како планирате да го поддржите професионалното новинарство на долг рок?
- На кои принципи се заснова вашата медиумска стратегија за создавање услови за функционирање на независни медиуми?
- Што ќе направите за подобрување на независноста на финансирањето на МРТВ и како ќе придонесете кон политичката независност на јавниот сервис?
- На кој начин планирате да го поттикнувате колективното преговарање во медиумите, како еден од најдобрите начини за обезбедување на работничките права? Како планирате да обезбедите почитување на основните работнички права во медиумите?
- Каков е вашиот план за спречување на влијанието на политичките и бизнис центри врз медиумскиот пазар?
- Што ќе направите за подобрување на безбедноста на новинарите и медиумските работници? Која е вашата стратегија за прекинување на неказнивоста?
- Што ќе направите за економската одржливост на професионалните локални медиуми?
- Како ќе ја гарантирате политичката независност на медиумскиот регулатор?
- Што ќе направите за да ја поддржите медиумската саморегулација и медиумската писменост?
Од новинарското здружение и синдикатот велат дека очекуваат политичките чинители во изборите кои се сериозни да дадат искрени одговори кои понатаму ќе можат и да ги спроведат, а со цел подобрување на слободата на изразување и независноста на медиумите во нашата земја.