„СРПСКИ ТЕРОРИСТИ ЌЕ ГО НАПАДНАТ КУМАНОВО, А МАКЕДОНЦИТЕ НЕМА ДА САКААТ ДА СЕ БОРАТ ПРОТИВ СРБИТЕ“ Професор од Тетово сее страв, ќе реагираат ли институциите?

„По нападот на Бањска на северот на Косово, српски терористи ќе го нападнат и Куманово во Македонија“.

Ваков застрашувачки наслов, токму на Денот на народното востание на Македонија – 11 Октомври, е објавен во влијателниот приштински весник „Бота сот“, а во текстот е пренесена изјавата на Сулејман Мехази, универзитетски професор од Тетово, кој предвидува дека „Албанците од Македонија ќе бидат против српските терористи во Куманово, додека Македонците ќе бидат на страна на српските терористи“.

Професорот ова го поврзува со македонската политичка партија ВМРО-ДПМНЕ, за која вели дека доколку не гласа за уставните измени за внесување на Бугарите во Уставот, тогаш оваа партија ќе докаже дека е против ЕУ, а дека е со Србија и со Русија.

Тој дури оди дотаму со своите анализи што тврди дека лидерот на опозициската ВМРО-ДПМНЕ Христијан Мицкоски можеби е во тајна коалиција со српскиот претседател Александар Вучиќ со цел дестабилизација на Македонија.

„Ако опозициската партија на Мицкоски, ВМРО-ДПМНЕ, не гласа за уставните амандмани за внесување на Бугарите во Уставот, тоа значи дека партијата на Мицкоски е против ЕУ, а е со Србија и со Русија. Можеби опозициската ВМРО-ДПМНЕ е во тајна коалиција со претседателот на Србија Александар Вучиќ за дестабилизација на Македонија преку српските терористи во Куманово, ако се знае дека 80% од Македонците се со јазик, срце и душа со Србија. Откако ќе нападнат српски терористи во Куманово, тогаш нема да се борат Македонците со Србите, туку Албанците. Албанците од Македонија ќе бидат против српските терористи во Куманово, додека Македонците ќе бидат на страна на српските терористи“, изјавил Мехази за косовскиот весник.

Агенцијата за разузнавање со својата мрежа треба да види дали навистина постојат такви активности на територија на Србија насочени кон Македонија. Доколку има такво нешто, тогаш треба да се свика Совет за разузнавачка координација, иако јас лично мислам дека не постои опасност.

Наќе Чулев Поранешен технички министер за внатрешни работи

Поранешниот технички министер за внатрешни работи, Наќе Чулев, во разговор за Плусинфо вели дека МВР има должност да го контактира Мехази и да го повика на информативен разговор со цел неговите сознанија за можен терористички напад да бидат доставени до безбедносните служби.

– Коментарот на Мехази е во насока на моменталниот отворен конфликт на релација Белград-Приштина, па во наредниот период очекуваме да има повеќе вакви ликови коишто ќе настојуваат во конфликтот да ги инволвираат и соседните држави на Косово и на Србија. Но, ако тој професор од Тетово располага со информации за тоа дека припадници на некаква српска терористичка организација имаат намера да предизвикаат терористички или диверзантски активности на територија на Куманово, односно на територија на Македонија, по дефиниција треба веднаш да се вклучи Агенцијата за национална безбедност како најповикана институција во конкретниов случај, но и Министерството за внатрешни работи треба да го исконтактира човекот и да го повика на информативен разговор со цел овие негови прилично сериозни изјави да бидат доставени до службите кои треба да преземат превентивни активности во насока на спречување на такви терористички активности. Агенцијата за разузнавање со својата мрежа треба да види дали навистина постојат такви активности на територија на Србија насочени кон Македонија. Доколку има такво нешто, тогаш треба да се свика Совет за разузнавачка координација, иако јас лично мислам дека не постои опасност. Како и да е, лицето под итно треба да се искомуницира, бидејќи тоа е дел од сите безбедносни процедури – објаснува Чулев.