СРЕДБА АЗЕСКИ-ГРАФ Германија е прв економски партнер на Македонија, така треба да остане
Од особено значење е соработка со Унијата на германските индустриски и трговски комори –ДИХК, со која Комората во 2007 година потпиша билатерален меморандум за соработка, но и активно соработува на полето на проектни активности во рамки на Коморскиот инвестициски форум, вели Азески.
Претседателот на Стопанската комора на Северна Македонија, Бранко Азески, во просториите на Стопанската комора на Северна Македонија, одржа работна средба со заменик амбасадорот на Сојузната Република Германија, господинот Ото Граф.
На средбата се говореше за билатералната економска соработка помеѓу Сојузната Република Германија и Република Северна Македонија, која што двете страни ја оценија дека е на многу високо ниво.
Претседателот Азески истакна дека Стопанската комора на Северна Македонија, како најголема и најстара коморска организација во земјата, е подготвен и сигурен партнер за продлабочување на соработката, создавајќи и поддржувајќи поволна бизнис клима која овозможува привлекување и одржување на развојни инвестиции, посебно преку учеството во Коморскиот инвестициски форум и поддршката на економскиот развој на регионот.
Азески ги претстави и актуелните проекти и стратешките активности на Комората, ставајќи акцент врз поддршката на компаниите во нивните активности, преку креирање Совет за напредни технологии вклучувајќи ја и дигитализацијата, имплементацијата на дуалниот систем на образование, зголемување на соработката меѓу домашните и странските компании, како и поддршка на извозните активности на домашните бизнис сектор.
– Од особено значење е соработка со Унијата на германските индустриски и трговски комори –ДИХК, со која Комората во 2007 година потпиша билатерален меморандум за соработка, но и активно соработува на полето на проектни активности во рамки на Коморскиот инвестициски форум – вели Азески.
Тој додаде дека, низ годините Стопанската комора на Северна Македонија има значајна соработка со федералното Министерство за економска соработка и развој на Германија, со коешто во рамките на Отворените регионални фондови за Југоисточна Европа (Open Regional Funds for Sought East Europe), се спроведе Партнерскиот проект меѓу Асоцијацијата на балканските комори и Унијата на германските индустриски и трговски комори – АБК-ДИХК, за институционално зајакнување на балканските комори, поддршка на процесот на ЕУ-интеграција и унапредување на стопанската соработка меѓу регионот и Германија. Во рамките на истиот фонд, во март 2010 година Стопанската комора на Северна Македонија влезе во Регионалниот проект со ГТЗ „Export Consultancy Network“ – оформување на регионалната база на стопански консултанти во различни области.
На работниот состанок, претседателот Азески и заменик амбасадорот на Сојузната Република Германија, Ото Граф, заклучија дека соработката меѓу двете земји мора да продолжи со засилен интензитет, посебно на полето на економската соработка, зголемување на извозниот потенцијал на домашните компании и привлекување на што поголем број германски инвестиции.
Сојузната Република Германија е 16 години прв економски партнер на Република Северна Македонија и така треба да остане и во иднина. Во првите седум месеци од 2021 година трговската рамена меѓу двете земји изнесува 3,01 милијарди долари и бележи раст од 55,7%, споредено со истиот период во 2020 година, кога изнесуваше 1,93 милијарди долари. Извозот за првите седум месеци од 2021 година изнесува 2,3 милијарди долари, и бележи зголемување од 59,2%, во однос на истиот период 2020 година. Увозот изнесува 682,3 милиони долари, и бележи зголемување од 44,8% во споредба со истиот период во 2020 година. Во трговската размена остварен е суфицит од 1,6 милијарди долари, кој во однос на минатата година е намален за 66,07%.