СРБИЈА ВОВЕДУВА ЗАДОЛЖИТЕЛНО ОДЕЊЕ ВО ВОЈСКА? Потребни се војници, а дали има касарни?
Српското Министерството за одбрана подготвува нормативни, законски решенија и подзаконски акти.
Министерот за одбрана на Србија Небојша Стефановиќ денеска нагласи дека работат на повторно воведување задолжителната воена обврска во Србија. Тој рече дека не може да каже дека таква одлука ќе биде донесена оваа година, бидејќи „има многу аспекти на кои мора да се смета“.
– Работиме на сето тоа и тоа е вистинска потреба на армијата, потребни ни се повеќе војници. Нашиот Генералштаб даде свое мислење зошто мислат дека ни треба редовно служење воен рок – рече Стефановиќ.
Тој додаде дека намерата била да се почне сериозна дискусија за да не се донесе паушална одлука за задолжително служење воен рок.
Според него, Министерството подготвува нормативни, законски решенија и подзаконски акти додека во исто време, се разговара со ГШ доколку се одлучи во таа насока, дали има доволно касарни, дали капацитетите се подготвени да сместат војници и дали има доволно луѓе за нивна обука.