СРБИЈА НЕ САКА КОНФЛИКТ НА КОСОВО Вучиќ по средбата со Столтенберг во Брисел

Не мислиме дека сме предизвикале некаква провокација, но јас разбирам дека ние од Балканот сме им преку глава на сите во Брисел – изјави претседателот на Србија, Александар Вучиќ по средбата со генералниот секретар на НАТО Јенс Столтенберг во Брисел.

На заедничката прес конференција Столтенберг рече дека „конструктивниот дијалог е единствениот начин за решавање на тензиите на Косово“.

– Ги повикувам сите страни да покажат воздржаност и да избегнуваат насилство – рече шефот на НАТО.

Вучиќ изјави дека за Србија е важна улогата на КФОР, која тој ја почитува, и улогата на НАТО исто така.

– Веруваме дека секогаш ќе можеме да најдеме разбирање меѓу Столтенберг и НАТО за да обезбедиме мир и стабилност. Не сакам да ја префрлам вината на никого. Сакаме да избегнеме каква било можност за ескалација или конфликт – рече Вучиќ.

Во одговор на новинарски прашања, тој посочи дека српската војска и полиција „никогаш не ја преминале административната линија“.

– Поднесов список со сите напади врз Србите. Благодарен сум на НАТО што не излезе со такви невистини, за разлика од некои други – рече Вучиќ.

Српскиот претседател уште еднаш повтори дека неговата земја ќе остане воено неутрална.

– Србија е воено неутрална земја и така ќе остане. Нашата историја не е лесна, но сакаме да ја зајакнеме соработката со КФОР и НАТО и да избегнеме ескалација на конфликтот. Не мислиме дека сме предизвикале некаква провокација, но јас разбирам дека ние од Балканот сме им преку глава на сите во Брисел – рече Вучиќ.

Тој рече дека Србија во Косово се во многу тешка позиција за тоа.

– Многу е тешко кога си во ќош и немаш каде друго да одиш, тоа му реков на Јенс. Не очекувајте Србите да уживаат и да кажат колку им е убаво. Има нова генерација Срби кои нема да толерираат терор. Тие не го доживуваат Косово како независна територија, туку како територија на Србија и тоа нема да го толерираат – рече Вучиќ.