Спреј кој ги штити површините од ковид-19 до 90 дена (ВИДЕО)

Продажбата на спрејот кој ги штити површините од вирусот ковид-19 започнала во Хонг Конг по цена од околу осум евра, јавува британски „SkyNews“.

На научниците од Универзитетот за наука и технологија во Хонг Конг (HKUST) им требало 10 години да ја развијат оваа обвивка наречена „МАР-1“.

Според нивните зборови, оваа супстанца може да се распрска по површините на јавните места, како што се кваките и лифтовите, а прави заштита од коронавирусот.

– Овие места често се допираат и на тој начин стануваат многу ефикасни преносители на болеста – изјави професорот Џозеф Кван, еден од главните истражувачи од „HKUST“.

– Спрејот е направен од милиони нано-капсули со дезинфекциски средства кои остануваат ефикасни во уништување на бактериите, вирусите и спорите дури и откако ќе се исуши, рече професорот Кван.

Тој вели дека ефикасноста на „МАР-1“ е зголемена со полимери чувствителни на топло, кои се распаѓаат при допир со луѓето и ослободуваат дезинфекциски средства – за разлика од вообичаените средства за дезинфекција како што се белило или алкохол.

Спрејот исто така е нетоксичен и безбеден за кожа и околина, тврдат истражувачите.

Тој е одоборен за службена и масовна употреба уште во февруари, по клинички испитувања во болница во Хонг Конг.