Спасовски: Од утре во карантин секој кој не седи во самоизолација

По откриените триесетина случаи на граѓани кои не ја почитуваа наредбата за домашна изолација и беа затекнати надвор од своите домови, премиерот Спасовски најави дека од утре несовесните граѓани ќе бидат автоматски префрлани во центрите за карантин и кривично ќе одговараат.

–  Секој кој нема да биде во самоизолација, при проверка на полиција, директно ќе се носи во центар за изолација. Овие мерки ќе ги воведеме од утре. Затоа апелирам, граѓаните да ги испочитуваат мерките бидејќи нема да има пардон за никој. Никој не смее да го загрозува животот на граѓаните. Ќе има и кривични санкции и карантин – соопшти вечерва Спасовски, кој гостуваше во емисијата „Вин-вин“ на Телма телевизија.

Тој потврди дека е запознаен со фактот дека се почесто се откриваат луѓе кои не се придржуваат до самоизолацијата и карантинот и покрај патролните проверки.

Спасовски соопшти и дека Водно од утре ќе се затвори за граѓаните од 18 часот до 6 часот наутро за да се спречи собирање на граѓани и додаде дека ќе се испитуваат информациите за изнајмување на куќи во неколку скопски населби како и на договорите за издавање.

Потврди и дека капацитетите и на полицијата и на Армијата сега со вонредната состојба се ставени во функција комплетно и врз основа на тоа се подготвува план за подготвување и на едните и на другите.