Спасовски објаснува како биле казнети моторџиите без кациги – Заев, Филипче и Николовски

Не може да има неказнивост за кој било. Тоа, според  министерот за внатрешни работи Оливер Спасовски, е клучната порака по случајот во кој полицијата им изготви записници и платни налози за сообраќен прекршок за неносење заштитна кацига на премиерот Зоран Заев, вицепремиерот Љупчо Николовски и министрот Венко Филипче .

– Во однос на казните, колегите постапиле и направиле практично записник за сторен прекршок. Тоа е увидено преку материјално-техничките средства кои ги користи МВР и тоа што беше презентирано медиумите. Направени се  записници и се издадени платните налози и на претседателот на Владата и на двајцата министри. Многу е важно да се испрати пораката дека не може да има неказнивост за кој било – изјави денеска Спасовски, одговарајќи на новинарско прашање по посетата на Полицискиот центар Ѓорче Петров.

Прашан зошто се различни датумите на платните налози, Спасовски рече дека веројатно тоа е заради детекцијата, како што ги правеле во секторите за внатрешни работи врз основа на тоа ги направиле и датумите.

Во однос на тоа зошто обезбедувањето на премиерот не му укажало дека не носи соодветна опрема, Спасовски наведе дека тој што сторил прекршок тој си ја носи и одговорноста.

– Во конкретниот случај прекршок сториле претседателот на Владата и министрите и тие носат одговорност за тоа. Одделот за обезбедување е со друга насока во делот на обезбедувањето на животот и интегритетот на функционерите кои имаат обезбедување – наведе Спасовски.

Коментирајќи дали е доволна казната Спасовски истакна дека е доволно да функционираат институциите и да нема разлика меѓу обичен граѓанин и носител на функција.

– Ако не напишевме записник тогаш прашањето ќе беше зошто тоа не го направивте, а сега кога се напишани записници и казни и кога се менува едно време што го немало во Македонија сега прашањете е дали биле доволни 50 евра. Доволно е институциите да функционираат во една држава и да нема разлика помеѓу обичен граѓанин и носител на функција – истакна министерот Спасовски