ЈСП ДОЛЖИ 9 МИЛИОНИ ЕВРА САМО ЗА НАФТА Скопjани две години се возат на сметка на „Пуцко петрол“, до кога така?

Јавното сообраќајно претпријатие „Скопје“ за неплатени фактури кои се постари од две години, заклучно со 10 октомври, ѝ должи 552.213.052 денари или 9 милиони евра на компанијата „Пуцко Петрол“.

Компанијата „Пуцко петрол“ е во голема дилема. Од една страна, свесна е дека евентуалниот прекин на испораки на нафта за ЈСП ќе го остави Скопје без јавен превоз. Од друга страна, купувачот не плаќа и долгот само расте.

Проблемите со ЈСП траат со месеци, а Град Скопје и градоначалничката Данела Арсовска не нудат издржано решение. Патниците секојднево се изложени на тортура од различен вид – автобусите доцнат, а кога ќе дојдат, често се преполни или се расипуваат по пат. Деновиве маката на скопјани е уште поголема, затоа што повторно не возат приватните превозници. Згора на сè, луѓето се возат со страв. После сообраќајката кај „Мавровка“, кога двоктен автобус се качи на жардиниерата среде булеварот, излезе на виделина дека автобусите не се одржуваат согласно прописите и техничките упатства и претставуваат опасност и за патниците и за околината, а дополнително возилата често се палат.

Патниците се прашуваат каде одат парите од даноците што му ги уплаќаат на Град Скопје и се прашуваат дали корупцијата го празни градскиот буџет.

Без разлика дали ЈСП ќе добие гориво или не, јасно е дека претпријатието е пред колапс.

Освен долгот од 9 милиони евра, поради кој може да му биде блокирана сметката, ЈСП има долгови и за плати, кон приватните превозници и кон добавувачи за моторни масла, гуми итн.

Не можевме, а да не се запрашаме, дали претпријатието има иднина или скопјани и студентите и пензионерите ќе останат без јавен превоз. Основано во 1948 година, Јавното сообраќајно претпријатие, со сигурни чекори ита кон стечај и по сè изгледа 2024 е годината кога ЈСП ќе замине во историјата.

Незадоволните граѓани кои чекаат автобус и по 60 минути, но и милионските долгови во кои тоне претпријтието, укажуваат на тоа.

Дали во следните денови може да се очекува комплетен колапс на ЈСП?