„СОГЛАСНОСТ ОД ФИНАНСИИ“ ОДИ ВО ИСТОРИЈАТА По нова година секоја државна институција сама ќе одлучува за нови вработувања
Раководните лица претходно ќе потпишуваат изјава дека ќе вработуваат согласно буџетот, а ако го надминат ќе одговараат кривично, објасни министерот за финансии Фатмир Бесими.
Министерот за финансии Фатмир Бесими најави дека со измените на Законот за буџет, кои ќе стапат во сила на почетокот на идната година, сите министерства, јавни претпријатија, акционерски друштва во државна сопственост, јавно-приватни субјекти ќе можат да вработуваат без да добијат согласност од Министерството за финансии.
Со овие измени се укинува „согласноста за вработување“ па институцијата ќе може да вработува само со изјава од раководно лице на институцијата дека се обезбедени средства за вработување.
– Секој министер ќе одлучува колку нови луѓе му требаат и тие треба да бидат во согласност со буџетот на институцијата. Во случај да се надмине буџетот одговорноста паѓа врз министрите. Тие претходно ќе пишуваат изјава дека ќе вработуваат согласно буџетот, а ако го надминат ќе одговараат кривично – рече на брифингот со новинарите министерот за финансии Фатмир Бесими.
Фатмир Бесими не смета дека со ова ќе настане хаос од вработувања во јавниот сектор, напротив, според него, со ова се става ред. Тој додаде дека доколку станува збор за претпријатија кои се загубари и ако имаат потреба од нови вработувања, одлука за тоа ќе носи владата.