СОФИЈА ГО ОДБИ ОРБАН На Бугарија не ѝ требаат посредници во спорот со Скопје, рече бугарскиот шеф на дипломатијата

„Европскиот договор со Република Северна Македонија е јасен. На Бугарија не ѝ требаат посредници во овој процес“.

Ова го изјавил  министерот за надворешни работи во техничката влада на Бугарија Иван Кондов за БГНЕС, коментирајќи го понуденото посредништво на унгарскиот премиер Виктор Орбан за надминување на проблемите меѓу Софија и Скопје.

Орбан денеска по средбата со македонскиот премиер Христијан Мицкоски во Охрид изјави дека Унгарија е подготвена да го искористи Претседателството со ЕУ и да посредува во прашањето со Бугарија.

– Дали страните се подготвени да ја прифатат Унгарија како посредник, ќе видиме. Тоа е нивна работа, но ние сме подготвени и сакаме да работиме на тоа да се најде решение, такво какво што одговара и на Македонија и на Бугарија. Но, тоа е работа на страните кои се во конфликт, ние сме тука да им помогнеме – изјави Орбан, според кого, одвојувањето на Албанија од Македонија на патот кон ЕУ е голема грешка на Брисел.