СО РЕДОВНИ КОНТРОЛИ ЛЕПЕНЕЦ ЌЕ БИДЕ ЧИСТ Весковски се сретна со жителите на Бардовци

Отворена е промотивна канцеларија на кандидатот на СДСМ за градоначалник на Општина Карпош Душко Весковски во Бардовци. Весковски со жителите на Бардовци разговараше за проектите предвидени за тој дел од Карпош.

– Ќе ја приклучиме локалната канализациска мрежа во канализацискиот систем на град Скопје. Целта на овој проект е прием на постојната канализациска мрежа во населбата во сеопфатниот градски систем. За таа намена, прво ќе биде изработена проектно-техничка документација за фекална канализација, која ќе биде во согласност со планската документација. Врз основа на тоа ќе биде утврдено кои делови од постојната мрежа ќе бидат задржани во употреба, а кои делови ќе се реконструираат – рече Весковски.

Се планира уредување на просторот пред објектот на Месната заедница, кој е запуштен. Овде се планира современо уредување со зеленило и со урбана опрема, што ќе доведе до зголемување на квалитетот на живеење во оваа атрактивна населба.

– Ќе се работи и на решавање на проблемот со нелегално фрлање отпад и градежен шут по текот на реката Лепенец. Овој повеќегодишен проблем е одраз на непочитувањето на законите, но целта е во најкус рок по преземањето на мандатот, да се обезбеди доволен број комунални редари и да се подобри нивната работа. Со интензивирање на контролите се очекува да се подигне нивото на одржување на комуналниот ред во општината, но истовремено преку санкционирање на прекршителите, да се зголемат и приходите на општинскиот буџет – рече Весковски.

Промотивната канцеларија во Бардовци останува отворена за прашања и предлози.