СО ПОТПИСИ ОД ПОЧИНАТИ ЛУЃЕ САКААТ ДА ГО СМЕНАТ ВРВОТ НА ЛДП На Зајкова ѝ е преку глава од нечесни игри

„Себеси се претставуваат како Иницијативен партиски одбор кој наводно сочинува две-третини од општинските организации, а всушност се работи за 5-6 луѓе од поранешното раководство на партијата кои се служат со фалсификување потписи и со манипулирање на членовите“.

Ова за Плусинфо денеска го изјави претседателката на Либерално-демократската партија (ЛДП), Моника Зајкова, која открива дека самата ги видела потписите на членовите кои се претставуваат како Иницијативен партиски одбор и со свои очи забележала дека помеѓу потпишаните има и одамна починати луѓе.

Таа вели дека на Централен одбор дискутирале и со членовите кои одлучиле свесно да стават потпис на иницијативата, меѓутоа, како што самите признале, се чувствувале измамено и воопшто не биле свесни дека се потпишуваат за одржување вонреден конгрес за избор на ново партиско раководство, туку им било кажано дека се потпишуваат за одржување тематски централен одбор.

– Нотирано е дека се потпишале претседатели на општински организации коишто биле распуштени од претходниот партиски лидер Горан Милевски во 2021 година и оттогаш не се повторно формирани. Таму стои претседател на општинска, има потпис од човекот, а истиот тој човек две години е починат. И сакам да изразам искрено сочувство и извинување. Значи, не сочинуваат две третини од општинските организации. Како и да е, ништо не можат да сторат – објасни Зајкова.

Таа вели дека со оваа работа веќе нема да се занимава, бидејќи планот ѝ е да се занимава само со реална политика во корист на граѓаните.

– Ајде прво да зборуваме за тоа кој ќе поднесе одговорност за добиените потписи, а потоа можеме да зборуваме и за решенија за граѓаните кои немаат време да го следат овој партиски циркус. Ако имаат да предложат некое решение кое ќе биде во корист на граѓаните, тогаш нека предложат и ќе го туркаме во Собрание. Меѓутоа, јас немам намера секој ден да играм пинг-понг. Дадов изјава за медиумите, кажав што имав да кажам, во меѓувреме одржавме два централни одбора, и стварно мислам дека е доволно. Не можеме на секој Централен одбор ние да го поставуваме прашањето „избор на ново раководство“. А истите тие наместо да дојдат таму да дискутираат, напаѓаат преку медиуми. Со тоа не мислат добро ни на ЛДП, ниту ги интересираат граѓаните, ниту државата – ни изјави Зајкова.

Од друга страна, Иницијативниот партиски одбор, кој отворено се залага за смена на претседателката Моника Зајкова, остро реагира на нејзината изјава дека ЛДП се стреми да биде дел од власта, а не само да кокетира.

Оттаму коментираат дека ваквите изјави се небулозни и дека раководството на ЛДП, предводено од Зајкова, води непринципиелна политика која, наместо да се фокусира на интересите на граѓаните, е насочена кон задоволување на личните амбиции на водечките лица во партијата.

„На последните избори, граѓаните ја изразија својата волја и испратија јасна порака на Зајкова, која како носител на листа доби ‘црвен картон’ поради нејзините погрешни политики. Наместо да ја преземе одговорноста за изборниот пораз, таа без никаков срам најавува желба да биде дел од власта. Ваквото дволично однесување веќе е осудено од членството и од пошироката јавност. Очигледно, се појави достојна замена за паролата на Амди Бајрам: ‘Кој е на власт, јас сум со вас’“, коментираат од Иницијативниот одбор на ЛДП.

Оттаму додаваат дека партијата треба да престане со додворувањето кон власта и да ја прифати опозициската улога која граѓаните ѝ ја доверија.

Иницијативниот одбор тврди дека претставува големо мнозинство од две третини од општинските организации и бара смена на Зајкова.

Минатата недела, во интервју за дневникот на МТВ, Зајкова изјави дека ЛДП во Парламентот дејствува независно, како што дејствувала и во претходниот парламентарен состав, бранејќи ја својата либерално-демократска идеја и политика.

– ЛДП не кокетира со власта. ЛДП се стреми да биде дел од власта, а не да биде само кокета – изјави Зајкова.

На последните парламентарни избори, ЛДП настапи во коалиција со СДСМ.