Со оваа мисла се гине кога се вози под дејство на алкохол: Само кратко, ништо нема да ми се случи?!

Управување на моторно возило под дејство на алкохол е еден од најсериозните прекршоци што ги прават некои возачи. Да се управува моторено возило под дејство на алкохол значи да се нема ниту најмала почит кон себе, кон сопствениот живот, кон семејството, кон другите учесници во сообраќајот и кон општеството во целина, констатира Републичкиот совет за безбедност во сообраќајот и на патиштата.

Со жалење може да се констатира дека и покрај сѐ, некои поединци се уште се осмелуваат да седнат зад воланот и тогаш кога се под дејство на алкохол. Покрај слабиот карактер и комплетната неодговорност, една од причините за еден возач да седне „пијан “ зад воланот е потценувањето на ризикот и на опасноста да се случи сообраќајна незгода и убедувањето дека на кратко растојание може да се управува моторно возило и под дејство на алкохол.

РСБСП потсетува дека ниту еден возач кој учествувал во сообраќајна незгода со фатални последици не ни претпоставувал дека тоа може да му се случи токму нему и ниту еден возач не тргнал под дејство на алкохол да управува моторно возило на патување од 1000 километри. Напротив, најголем број од возачите кои биле под дејство на алкохол и кои учествувале во сообраќајна незгода со тешки и фатални последици, патувале на пократка дестинација, а многу често патувале во рамките на населеното место или регионот во кој престојуваат или живеат.

Водејќи се од тоа, РСБСП со потсетување, совети и пораки до возачите:

• Возач под дејство на алкохол не смее да започне да управува возило во сообраќај на пат.
• Дозволено количество алкохол во крвта кај возачите изнесува 0,5 г/кг. Кај професионалните возачи и kaj возачите почетници, не е дозволено никакво количество алкохол во крвта (0,09 г/кг).

Глобата за непочитување на оваа законска обврска изнесува од 225 до 375 евра во денарска противвредност.

• Полицискиот службеник на самото место привремено ќе му ја одземе возачката дозвола и ќе го исклучи од сообраќај возачот за кого ќе утврди дека е под дејство на алкохол.
• Управувањето на моторно возило под дејство на алкохол носи закана за одземање на возачката дозвола до 12 месеци.

Истражувањата покажуваат дека алкохолот ја намалува возачката способност, ја намалува концентрацијата и ја намалува функцијата на сетилата за слух и вид. Возачите под дејство на алкохол не се во способност благовремено да ги препознаат ризиците и опасностите во сообраќајот и се склони кон преземање на ризик и ги потценуваат последиците од сообраќајните незгоди.

РСБСП потсетува дека како последица на неодговорното учество во сообраќајот, изминатата година во Република Северна Македонија, 132 лица го загубија животот во сообраќајни незгоди, а 5164 лица беа повредени.

Согласно тоа, РСБСП упатува апел до сите возачи:

„Оваа лето безбедноста нека ви биде на прво место. Никогаш немојте да возите под дејство на алкохол затоа што возењето под дејство на алкохол носи смрт на патиштата!“