„СО МОЈОТ ТИМ ЌЕ БИДЕМЕ ОБЕДИНУВАЧКИ ФАКТОР НА СИТЕ ГРАЃАНИ“ Таравари претстави уште четворица експерти од неговиот кабинет
Кандидатот за претседател на коалицијата Вреди Арбен Таравари денеска го претстави вториот дел од неговиот кабинет ако победи на изборите на 8 мај. Станува збор за уште една група експерти, кои се докажани професионалци во академскиот свет, во приватниот и во јавниот сектор.
– Покрај стручноста и професионалниот придонес, секој од нив ја докажал и својата посветеност на сеопфатен општествен напредок во одредени каузи. Овие луѓе најдобро ја знаат и ја претставуваат реалноста на нашето општество. Сите тие ја делат истата посветеност да им служат на граѓаните на Северна Македонија, без етнички, верски или политички разлики – рече Таравари.
Тој рече дека амбасадорот Халим Хида ќе биде дипломатски советник на Претседателството. Амбасадорот Хида докторирал на Универзитетот „Свети Кирил и Методиј“ во Скопје, на Филозофскиот факултет. Моментално е амбасадор на мирот во светот и претседател на Здружението на албанските интелектуалци во Куманово и во Липково.
Јасмин Калац ќе биде правен советник на Претседателството. Јасмин магистрирал право на Универзитетот „Кирил и Методиј“, а докторирал кривично право на Универзитетот во Анкара, Турција. Јасмин работел во Основното јавно обвинителство Скопје, а сега е правник и предавач на Меѓународниот Балкански Универзитет.
Урим Вејсели ќе биде советник за безбедност и заштита. Тој е доктор по политички науки, вонреден професор, предавач на повеќе факултети во Република Северна Македонија и Косово, гостин-говорник на Универзитетот Џон Хопкинс во САД и на Институтот за одбрана за меѓународни правни студии во САД. Автор и коавтор на научни трудови со импакт фактор. Експерт за одбрана и управување со кризи.
Д-р Аријанит Река, портпарол, вонреден професор на отсекот хемија при Факултетот за математичко-природни науки на Универзитет во Тетово. Фулбрајт алумни од Соединетите Американски Држави, докажан професионалец, автор на многу научни публикации.
– Со овој одличен тим од докажани професионалци, имам непоколеблива доверба дека ќе ги носиме напред идеалите на Вреди, кои всушност се најточниот одраз на очекувањата и надежите на граѓаните за промени, просперитет и благосостојба за земјата и за нивните семејства. Со овие луѓе со добра волја ќе ги надминеме предизвиците пред нас и ќе ја урнеме 22-годишната тиранија на владејачката партија. Затоа велам промената вреди – рече Таравари и ги повика граѓаните да им се придружат на ова патување со нивните идеи и барања.
– Јас и мојот тим сме тука да ве слушаме. Ќе слушаме, ќе разговараме и ќе се грижиме за секој од вас. Како претседател, заедно со овој тим, ќе бидеме обединувачки фактор и ќе работиме во најдобар интерес на сите граѓани на Северна Македонија, но и на генерациите што ќе дојдат после нас – порача Таравари.