СО ЕВРОПСКО ЗНАМЕНЦЕ ЌЕ ГО ЗАТВОРАТ НАЈГОЛЕМИОТ ПРИВАТЕН РАБОТОДАВАЧ Бараат дистанца од школите, а ги носат игрите на среќа во сечиј дом

И покрај сите апели секторот игри на среќа да не станува дел од предизборните калкулации на партиите, денеска почна пленарната седница на која пратениците ќе се изјаснат дали скандалозните и противуставни законски измени ќе бидат испратени на потпис кај Претседателот на Републиката.

– Одговорно тврдиме дека одредбата за дистанцирање на легалните објекти на 500 метри од образовните институции не се за заштита на младината како што упорно се тврди. Напротив, станува збор за чист предизборен популизам кој треба да ја задоволи критичката јавност, додека законот содржи низа други одредби кои се наменети да остварат нечии бизнис интереси. Пратениците кои решиле да ги гласаат овие измени нека си го постават прашањето каква заштита може да обезбеди дистанцата кога државата веќе преку четири друштва организира онлајн игри на среќа со кои младите непосредно се изложени на постојан ризик преку достапноста на интернетот во секаде и во секое време? – праша Горан Стоименов, претставник на Асоцијацијата на приредувачи на игри на среќа (АПИС).

Тој ги потсети пратениците на скандалот „Детонатор“ кога во Источна Македонија беа запленети 1.500 нелегално поставени покер апарати.

– Кој направил погрешна проценка дека затворањето на легалните објекти, кое неминовно ќе предизвика никнување на диви играчници по подруми како во 1990, носи некому гласови на избори? Зарем во такви услови на безредие младината ќе биде повеќе заштитена? Со гласањето „за“ овие измени пратениците на душа ќе си ги стават судбините на семејствата на 10.000 вработени во секторот игри на среќа. Илјадници Македонци од економски маки ги напуштаат своите родни огништа и си ја бараат среќата во туѓина. Со гласањето пратениците ќе создадат најмалку 35.000 нови кандидати за иселеници во западните земји. Срамно е да се тврди дека пратениците се залагаат за полноправно членство во ЕУ кога со злоупотреба на тоа знаме со антидемократски и антиевропски манипулации се истуркаа законски измени кои ќе го затворат најголемиот приватен работодавец во Македонија – рече Стоименов.

Тој уште еднаш најави дека немаат намера да молчат на неправдата која им се нанесува. Им порача на сите надлежни институции дека ќе водат правни битки, ќе следи иницијатива пред Уставен суд, ќе следат тужби за астрономски отштети кои ќе се прекршат преку грбот на народот.

– Како претставници на инвестиции кои доаѓаат од земји членки на ЕУ, општествено одговорни компании кои во континуитет градат партнерски однос со заедницата, го повикуваме претседателот Стево Пендаровски да опстои на најавата дека нема да го потпише Указот за стапување на сила на овие скандалозни и противуставни измени поради злоупотреба на скратените процедури што ги овозможува ЕУ знамето и опструирање на гласањето на клучен амандман за спасување на вработените – нагласи Стоименов.

Тој апелира до критичката јавност со особено внимание да ги слуша нашите аргументи и да не потпаѓа на предизборните манипулации на одредени политички актери. Затворањето на легалните игри на среќа ќе предизвика далекусежни последици кои потоа многу тешко ќе се санираат.