СО БУГАРСКИ ОЧИЛА ЉУБЧО ВИДЕЛ „СРПСКИ ДИКТАТ“ ВО МАКЕДОНИЈА Сме правеле заедничка историја со Србите, тврди лидерот на ВМРО-Народна
„Премиерот Христијан Мицкоски и вицепремиерот Александар Николовски настапуваат со една чиста реторика од аспект на агресија, игнорирање, па дури и застрашување на македонските Бугари, што потсетува на старото комунистичко време“, изјавил Љубчо Георгиевски за бугарската телевизија БТВ.
„Во Македонија има прекин на евроатлантскиот процес. Земјата нагло се отвора кон т.н. српски свет“.
Ова утрово го изјави лидерот на ВМРО-Народна партија и поранешен македонски премиер во периодот 1998-2002 година, Љубчо Георгиевски, во интервју за бугарската БТВ.
Според него, „ни во времето на комунистичка Југославија немало такво приближување кон Србија“.
– Нема да има опасност за Македонија да го смени Уставот и да ги внесе Бугарите во него. Со сите овие агресивни муабети како претставниците на македонската влада да сакаат да се докажат пред некој друг колку се антибугари – изјави Георгиевски.
Тој ги коментираше и неговите сомнежи дека во земјава постои српски диктат.
– Оваа приказна за бугарскиот диктат ја слушаме веќе 2 години и откако ВМРО-ДПМНЕ беше во опозиција. Република Северна Македонија не работи под бугарски, туку под српски диктат. Имаме процес на сложено занемарување на македонската историја и правење заедничка историја со Србите – рече Георгиевски.
Според него, во последните 6 месеци комуникацијата со Европа може да се изброи на прсти.
– Идејата сега е да има измени на Уставот со одложено дејство. Но, нема ниту една изјава од европски политичар што ја поддржува оваа позиција. Загрижен сум дека ќе изгубиме уште 4 години, како што беше случајот со Никола Груевски и спорот за името со Грција. Рекоа дека и тогаш сите не поддржуваат, но ние чекавме 11 години – изјави Георгиевски.
Тој има забелешка и на начинот на кој се адресира проблемот со Бугарија.
– Ако нешто треба повторно да се преговара, сигурно треба да се промени стилот што го применуваат нашите власти. Треба да се примени тивка дипломатија, а не од тоа да се прави маркетинг. Имам чувство дека како да сакаат да се докажат на некој друг, колку се антибугари. Има и една друга реторика на премиерот Христијан Мицкоски и на вицепремиерот Александар Николовски за Бугарија во Македонија, кои настапуваат со една чиста реторика од аспект на агресија, игнорирање па дури и застрашување на македонските Бугари, што потсетува на старото комунистичко време – рече Георгиевски.