„СО БАЛАНСЕРОТ НЕ СЕ ВРАБОТУВАА ЧЕСНИ ГРАЃАНИ, ТУКУ ПАРТИСКИ ПОСЛУШНИЦИ“ Движењето ЗНАМ им возврати на ДУИ и на Османи

Изјавите на ДУИ се уште еден очајнички обид да се префрли вината од сопствените 20 години коруптивна и партиска влада врз другите. Граѓаните многу добро знаат дека ДУИ не постои за да ја брани еднаквоста, туку за да го брани својот систем на етничка трговија, партиски вработувања и корупција, реагираше ЗНАМ преку соопштение.

„ДУИ не може да зборува за ‘темели на мултиетничко општество’ кога токму нивните партиски послушници преку балансерот ги уништуваа институциите и го поставуваа сопствениот интерес над законот. Со балансерот не се вработуваа чесни граѓани од сите заедници – туку свои блиски, братучеди и партиски послушници! На тој начин, се создаде паралелна држава во која членската книшка на ДУИ вредеше повеќе од диплома, знаење или труд. Народот памети и дека Артан Груби и неговите соработници ја претворија државата во личен бизнис клуб и создадоа длабоки поделби меѓу граѓаните. Бујар Османи, човекот кој е симбол на лицемерие, од позиција на министер за надворешни работи, ги искористи европските и дипломатските реторики за лична и партиска корист, додека македонските интереси беа загрозени и распродадени во целост. За Самитот на ОБСЕ беа потрошени над 120 милиони денари без соодветни документи, фактури или извештаи за трошењето. Единствената ‘победа’ што ја остави по себе беше преголемото трошење јавни средства без отчетност, додека интересите на граѓаните беа ставени на маргината“, се вели во реакцијата.

Максим Димитриевски и Движењето ЗНАМ за Наша Македонија стојат на страна на граѓаните – на сите граѓани, без разлика на етничка припадност. Нашата борба не е против заедниците, туку против коруптивниот систем што го задушуваше развојот и еднаквоста во Македонија, наведено е таму.

„За нас, како политички субјект, Рамковниот договор е завршена работа – апсолвирана и во целост исполнета. Но факт е дека правилото на Бадентер во одредени моменти ја доведува во прашање функционалноста на државата и, исто како со балансерот, се злоупотребува од моноетнички политички партии за сопствени интереси. Како и досега, зборовите на Максим Димитриевски ќе се потврдат, веднаш по изборите. ДУИ денес, од позиција на опозиција, може само да вреска и да шири страв и лажни сценарија. Народот ве казни за тоа што ја претворивте државата во приватна фирма и за злоупотребата на секој закон и институција за сопствени џебови. Октомври ќе биде уште посилен удар – граѓаните ќе покажат дека корупцијата и партиската алчност не поминуваат неказнето. Движењето ЗНАМ се залага Македонија да остане праведна, модерна и европска држава за сите граѓани, каде законот и институциите служат на народот“, наведено е во соопштението.