СМРТНИ ЗАКАНИ КОН ЏАБИР ДЕРАЛА – „КУРШУМОТ КАЈ И ДА Е ЌЕ ТЕ СТИГНЕ!“ ЗНМ го пријави случајот во МВР
МВР и ОЈО треба веднаш да ги истражат и да ги процесираат заканите со цел да ги казнат оние кои го прекршуваат законот, но и да превенираат евентуални вакви кривични дела во иднина, се вели во соопштението на ЗНМ.
Здружението на новинарите на Македонија (ЗНМ) поднесе пријава до МВР во врска со директна закана по живот кон основачот на Цивил медиа Џабир Дерала.
Пријавата уследи по директната закана кон Дерала во форма на коментар на негова објавена колумна на официјалната Фејсбук страница на „Нова ТВ веб“ каде што профил со име Александар Антиќ напишал коментар: „Биди видлив гнидо, куршумот кај и да е ќе те стигне“.
ЗНМ стапило во комуникација со контакт лицето во МВР задолжено за напади врз новинари, а пријавата е истовремено адресирана и до Секторот за компјутерски криминал и дигитална форензика при МВР.
„Укажуваме дека заканите по живот се кривични дела опфатени во Кривичниот законик за што е предвидена затворска казна за сторителите, а МВР и ОЈО треба веднаш да ги истражат и процесираат со цел да ги казнат оние кои го прекршуваат законот, но и да превенираат евентуални вакви кривични дела во иднина“, се вели во соопштението на ЗНМ.
Оттаму потсетуваат дека за случаи каде што има експлицитни закани по безбедноста на новинарите и медиумските работници, ЗНМ и МВР имаат протокол за соработка каде што се дефинирани практичните чекори како да постапат новинарите кога ќе бидат предмет на закана преку социјалните мрежи и, воопшто во работата.