СЛУЧАЈОТ СУДСКИ СОВЕТ ЌЕ БИДЕ РАСЧИСТЕН ДЕНЕСКА Мицкоски нема да ги поштеди ни сегашните функционери ако ја изиграат правдата

Премиерот Христијан Мицкоски очекува случајот со фалсификувањето на записниците на Судскиот совет да биде расчистен уште денеска.

– Таму (Судски совет) знаете дека постои основано сомневање за големи злоупотреби што се правени во изминатиот период. Конкретната акција од вчера е како што кажавме со цел да се потврди основаното сомневање за фалсификат на записници од работата на Судскиот совет преку кои, практично се манипулирала волјата и мислењето на членовите на Судскиот совет од страна на поединци. Очекувам дека и тоа многу скоро денеска ќе биде расчистено – рече Мицкоски по поставувањето камен темелник на нова инвестиција во Кичево.

Тој повтори дека треба да се врати довербата на граѓаните кај судството, а правдата да биде еднаква за сите во Македонија.

– Тоа важи за сите кои правеле криминал порано, но и за сегашните кои мислат дека можат да ја изиграат правдата – рече Мицкоски.