СКАНДАЛ ВО МЕДИЦИНСКИОТ ТУРИЗАМ, СЛОВЕНКА ПОЧИНА ВО ИСТАНБУЛ Имала тешки симптоми по липосукцијата

Трагедија со 44-годишна жена од Словенија, која почина по козметичка операција во Истанбул, ги врати дебатите за безбедноста на евтините медицински процедури во странство.

Жената отпатувала во Турција кон средината на декември за липосукција, поради значително пониска цена отколку во Словенија. Целиот аранжман бил организиран преку агенција пронајдена на интернет, која обезбедила логистика, сместување и комуникација со клиниката.

Кратко по операцијата, додека била во хотел, состојбата на пациентката почнала да се влошува. Таа неколкупати ги известила лекарите за сериозни симптоми како лоша општа состојба и крварење.

Семејството тврди дека симптомите не биле сфатени сериозно.

„Ова е нормално по процедурата“

Единствената комуникација со клиниката била преку преведувач кој зборувал хрватски. Жената била информирана дека „ова е нормално по процедурата“, иако нејзините симптоми укажувале на сериозни компликации.

Четири дена по операцијата, таа доживеала срцев удар, наводно предизвикан од белодробна емболија — состојба која може да биде фатална ако не се третира веднаш.

Кога состојбата нагло се влошила, таа се обидела да побара помош преку единствениот достапен број, но преведувачот не се јавил до околу еден час подоцна. По краток разговор, контактот бил изгубен. Сè уште не е јасно кој ја пронашол или колку време поминало пред да биде пренесена во болница со оддел за интензивна нега.

Во новата здравствена установа, лекарите ја реанимирале, ја интубирале и поврзале на механички вентилатор, но таа починала на 2 јануари, десет дена по операцијата.

Обдукција и истрага

Во Институтот за судска медицина во Љубљана е извршена обдукција со цел да се утврди точната причина за смртта. Белодробната емболија се споменува меѓу компликациите, но официјалните резултати сè уште се чекаат.

Словенечката полиција, во соработка со Интерпол, побарала информации од турските институции, но досега добила само основни и нецелосни податоци за процедурите и редоследот на интервенциите.

Министерството за надворешни работи на Словенија ја потврдило смртта на државјанката, но не дало дополнителни детали поради заштита на лични податоци. Семејството посакува правна помош и истрагата продолжува.

Ниска цена, но зголемен ризик

Традиционално, Турција е атрактивна дестинација за медицински туризам поради пониските цени на естетските процедури. Но, експертите предупредуваат дека ниската цена често оди со зголемен ризик.

Според Клемен Рогељ, раководител на Клинички оддел за пластична хирургија во Универзитетската болница во Љубљана, најчести компликации од козметички операции во странство се инфекции, проблеми со заздравување, смрт на ткиво, па во потешки случаи сепса.

Тој потенцира дека ваквите процедури генерално не се препорачуваат поради ризиците.