Следните два месеци се можни проблеми во глобалното снабдување со храна

Пандемијата со коронавирусот може да влијае на безбедноста со снабдувањето на некои видови храна, бидејќи воведувањето на мерки за изолација и ограничувањето на движење негативно влијаеше на достапноста на работна, објави Организацијата за храна и земјоделство при Обединетите нации (ФАО).

Како што пренесува „CNBC“, досега нема нарушувања во глобалното снабдување со храна, бидејќи испораките биле доволни. Сепак, според институцијата, проблеми со снабдувањето може да се очекуваат во текот на април и мај.

Мерките за ограничување на движењето и социјалното растојание можат да го намалат земјоделското производство, проценува „ФАО“. Слична е ситуацијата со компаниите за храна кои преработуваат земјоделски производи.

– Веќе гледаме предизвици во форма на логистички проблеми, бидејќи пратките со храна не се во можност да се движат од една до друга точка, како влијанието на пандемијата врз секторот производство на добиток заради ограничениот пристап до добиток и намалениот капацитет на кланици (заради логистичкото нарушување и недостигот на работна сила), како што слично се случи во Кина – наведува „ФАО“.

Во овој контекст, може да се очекува скок на цените, како што е месото и производите со краток рок на траење, а не толку кај главните прехранбени производи од кои има доволно во залиха, според „ФАО“.

Дека нема да недостастуваат и главните намирници смета и „Fitch Solutions“.

– Производството на житни култури во развиените земји, што обично се одвива на големи фарми во помалку населени места, е помалку чувствително на мерките за изолација. Но, секторите со интензивна работа, како што се плантажите и производството и преработката на месо, се повеќе изложени на ризик од изолација на работниците – стои во белешката на „Fitch“.

Иако има доволно од главните прехранбени производи, ограничувањето на извозот што можеби ќе го воведат некои земји го зголемува ризикот за нивен недостаток.

На пример, Виетнам значително го намали извозот на ориз за да создаде резерви од 270.000 тони за да го нахрани своето население. Русија, од друга страна, го суспендира извозот на преработени житни култури, поради зголемената побарувачка од страна на нејзините потрошувачи.

Но, извозот на пченица, во кој земјата е светски лидер, досега не е ограничен. Казахстан исто така го стопираше извозот на пченица, леќа, шеќер, сончогледово масло и некои видови зеленчук.

Покрај значително нарушување на глобалното снабдување со храна, ваквите потези би можеле да резултираат со забрзано зголемување на цената на храната во време кога потрошувачите се загрижени за мерките за изолација и создавање набавки за дома, велат од „Fitch Solutions“.

Според нивните аналитичари, земјите кои се изложени на зголемувањето на цените на храната се оние во кои увозот има поголем удел во вкупното снабдување со храна, како што се земјите од Блискиот исток, Јапонија и Јужна Кореја.

Поради наплатата во долари во меѓународната трговија со храна, се изложени земјите со ослабени валути, како Индија и Индонезија, велат од „Fitch“.