СЛЕДНАТА МЕТА НА РАКЕТАТА „ОРЕШНИК“ МОЖЕ ДА БИДЕ КИЕВ Путин се закани на самитот во Астана
Во случај на масовна употреба на „Орешник“, силата на ударот ќе биде споредлива со нуклеарно оружје, рече рускиот лидер и се закани со напади врз центрите за одлучување во Киев.
Рускиот претседател Владимир Путин се закани дека ќе ги гаѓа „центрите за одлучување во Киев“ со новата хиперсонична интерконтинентална балистичка ракета „Орешник“ и спомна дека Украина повеќепати ги нападнала со дронови центрите Москва и Санкт Петербург, јави „Гардијан“.
Путин на самит на Организацијата на Договорот за колективна безбедност во Астана во Казахстан се пофали дека неговата земја произведува десетпати повеќе ракети од сите земји на НАТО заедно.
Рускиот лидер посочи дека Русија била принудена да ја распореди новата ракета „како одговор на дејствијата на непријателот“, повикувајќи се на употребата на проектилите произведени од САД и Велика Британија во руска територија.
Тој рече дека западни еквиваленти на рускиот „Орешник“ нема да се појават наскоро.
– Во случај на масовна употреба на „Орешник“, силата на ударот ќе биде споредлива со нуклеарно оружје – рече тој.
Извори од САД и Велика Британија за „Гардијан“ изјавиле дека ракетета „Орешник“ со која Русија го гаѓаше Дњепропетровск има дострел и до 5.500 километри.
Руската агенција ТАСС пренесува дека Путин во Казахстан рекол и дека може да се појават други нови ракетни системи и дека Русија ќе продолжи со борбените тестови на „Орешник“.