Славниот готвач им ја платил венчавката откако младенците се пожалиле дека им ја уништил

Познатиот британски готвач Гордон Ремзи, на една двојка им го платил целиот износ за венчавката откако им ја „уништил“ церемонијата на приватната плажа, пишува „Сан“.

Додека се забавувале и фотографирале, славниот готвач истовремено ја снимал својата нова емисија „Идни ѕвезди на храната“ (Future Food Stars).

Младоженецот Чарли рекол дека присуството на Гордон било вистински кошмар и дека тој им ги уништил свадбените фотографии.

– И двајцата работевме толку напорно за да заштедиме за тој ден. На крајот, се чувствувавме како статисти во шоуто – изјавил Чарли за британските медиуми.

Имено, двојката платила 1.300 фунти за храна за шесте лица кои присуствувале на свадбената прослава.

Тие подоцна добиле извинување од тимот на Ремзи.

„Жал ни е што ви го уништивме специјалниот ден, тоа не беше намерно. Како што знаете, ја плативме вашата венчавка во целост. Се надеваме дека се искупивме“, пишувало во пораката што ја добиле, а готвачот им ги вратил парите за уништената венчавка.