СКОПЈЕ САМО ПРИВРЕМЕНО Е СПАСЕНО ОД КОЛАПС, НЕИЗВЕСНОСТА ТРАЕ, А ПРОТЕСТИТЕ ЌЕ ПРОДОЛЖАТ Владата ќе го ублажи проблемот со 100 електрични автобуси

Приватните превозници Јофи Бус, Вестор Транс и Радос Компани денеска на прес-конференција ќе го изнесат нивниот став за состојбата со јавниот превоз во Град Скопје, кој цела седмица беше во колапс.

Премиерот Христијан Мицкоски синоќа од Белград најави дека се прави анализа за набавка на 100 до 120 електрични автобуси, што нема да бидат распределени само во Скопје, туку и во другите општини каде што има организиран јавен градски превоз.

– Ние сме одговорна Влада и така ќе продолжиме да се однесуваме. Анализираме каква е расположливата моќ на буџетот за набавка од 100 до 120 електрични автобуси заедно со 50-тина полначи, коишто ќе бидат распределени не само во Скопје за ЈСП, туку и за оние општини каде што има организиран јавен градски превоз, по пропорцијата 80 наспрема 40 или можеби ќе биде 70 наспрема 70, ќе видиме. Размислуваме и ја анализираме оваа ситуација и убеден сум дека набргу ќе изнајдеме едно решение со кое што драматично ќе го олесниме и јавниот превоз во Скопје, но и во другите општини – рече вчера Мицкоски.

Тој додаде дека Бирото за јавни набавки позитивно одговори на барањето на ЈСП за итна постапка за набавка на нафта, по пат на преговарање.

– До депоата на ЈСП се доставени 250.000 литри нафта. Денеска е нормализирана состојбата. И овие се позајмени количини. ЈСП треба час поскоро да ги набави количините што се потребни за нормално функционирање, бидејќи овие 250.000 литра ќе бидат доволни за 10 дена, две недели, три недели, но, нема трајно да го реши проблемот. Од тие причини мислам дека направивме еден потег којшто овозможува да не се случува тоа што се случуваше претходниот ден и да се надминат политичките разлики и да се испорача за граѓаните – рече премиерот Мицкоски.

На прашањето зошто три години точката за набавка на нови автобуси не била ставена на гласање на Совет на Градот Скопје и за тврдењата на градоначалничката Данела Арсовска дека сите опции биле дадени на располагање, дури и власта да ги постави условите, а таа само да го потпише договорот, Мицкоски рече дека тоа што се нудело на маса не е решение.

– Тоа не е точно. Прво, ние не сме мнозинство во Градот Скопје, мнозинството се таму други коалициони партнери. Таму има директори на градските претпријатија кои доаѓаат од политичката партија Левица, или блиски до политичката партија ДУИ, блиски до поранешен градоначалник на една скопска општина, директори кои се поставени од други моќници кои сега не се присутни во Градот Скопје итн. Таму е многу, би рекол, сложена ситуацијата, така што тоа не е решение. Тоа што се нуди на маса, да се позајми и да се купат 20-30 автобуси, тоа не е решение. Ние зборуваме за сериозен пристап што ќе значи, прво намалување на емисијата на штетни гасови во воздухот, а второ, нешто што ќе биде одржливо на подолг рок. Тоа го нудиме ние – рече Мицкоски.

Владата завчера на вонредна седница одлучи да му позајми нафта на ЈСП од државните резерви. Со тоа се надмина кризата и автобусите се вклучија во сообраќајот.

Директорот на ЈСП „Скопје“, Драги Кушовски вели дека автобускиот сообраќај во Скопје од вчера е нормализиран. Количините на нафта не се испорачани целосно, туку се испорачуваат сукцесивно, а испораката засега е доволна.

– Сите линии сообраќаат, исто како и претходно, односно исто како пред да се појави проблемот со недостиг на горивото. Сите автобуси кои се во возна состојба редовно сообраќаат – рече Кушовски.

Жителите на Општина Шуто Оризари вчера протестираа пред Град Скопје поради состојбата со превозот, а на протест излегоа и студентите од УКИМ.

• 🎥 📷 ДОБРО СЛУШНЕТЕ НЀ, ЗАШТО ПАК ЌЕ ВИ ДОЈДЕМЕ! Скопјани излегоа на протест пред бараките на Град Скопје, бараат ефикасен јавен превоз

Градоначалникот Курто Дудуш изјави дека граѓаните на Шуто Оризари 730 дена немаат пристап до јавениот превоз. Според него, расистички, дискриминаторски, нехумано и неодговорно е 40.000 граѓани две години да немаат јавен превоз. Тој побара од градоначалничката на Град Скопје, Данела Арсовска итно да постапи по возниот ред, објавен на страната на ЈСП и од денеска да возат автобусите по улиците на Општина Шуто Оризари.

– Итно да се ревидира одлуката на ЈСП и Градот, во која се наложува во Шуто Оризари да возат над 90 отсто од приватните превозници. Итно да си ги подмирите долговите кон приватните превозници и да им овозможите услови да продолжат да возат во Шуто Оризари. Итно да пуштите нови автобуси да возат во Шуто Оризари. Итно да се обезбедат услови за редовно собирање на смет од домаќинствата во општина Шуто Оризари и на дивите депони. Да обезбедите одржливост на донесените одлуки и да не се доведете во ситуација пак да ви дојдеме со истите барања после еден месец – рече Дудуш.

Претседателот на Универзитеското студентско собрание на Универзитетот „Св. Кирил и Методиј“ во Скопје, Александар Николовски на протестот изјави дека од спроведената анкета на над 3500 студенти, 85 отсто од студентите во последниве две недели чекаат автобус повеќе од 15 минути, а 65 отсто повеќе од 20 минути. Дополнително, 95 отсто од студентите не се задоволни со услугите коишто ги нуди Градот Скопје во однос на јавниот градски превоз.

– Универзитеското студентско собрание се приклучи на овој протест, поради тоа што сметаме дека од лични интереси, партиски или политички препукувања студентите и средношколците не смеат да трпат товар. Затоа, бараме да престане злопупотребата и паѓањето на благосостојбата на студентите и срендошколците во текот на колоквиумската испитна сесија – рече Николовски.

Одговорноста за колапсот со јавниот превоз меѓусебно си ја префрлаат секоја од страните која има каква било надлежност.

Од Град Скопје одговорноста ја префрлија на советниците на ВМРО-ДПМНЕ и на директорката на Бирото за јавни набавки поради поништената постапка за набавка на гориво за автобусите, а од Бирото за јавни набавки соопштија дека ЈСП избрал неприфатлива понуда за најповолна.

Од Советничката група на ВМРО-ДПМНЕ, пак посочуваат дека тие досега ги изгласале сите програми за Град Скопје, вклучително и за ЈСП, но дека надминувањето на кризата зависи од менаџирањето од страна на Град Скопје и Јавното сообраќајно претпријатие.

Претседателот на Синдикатот на возачи при Сојузот на синдикати, Миќо Стојановски завчера рече дека состојбата со нафтата е проблем што трае веќе подолг период. Според Стојановски, за колапсот во ЈСП и во другите јавни претпријатија во градот придонело и несогласувањето меѓу претседавачот на Советот на Град Скопје и градоначалничката Данела Арсовска.

-Бирото за јавни набавки ја суспендирало постапката за набавка на нафта од Пуцко петрол. Факт е дека ЈСП му должи доста пари на Пуцко Петрол, факт е дека Владата односно Министерството за образование му должи доста пари на ЈСП и кога би се пребиле тие средства, ние ќе бидеме чисти како фирма. Гориво нема, возат само автобусите на метан, околу 25-30 и уште по некој автобус на кој му останало нафта – рече вели Стојановски.

Стојановски вели дека и приватните превозници треба да се вратат на улиците бидејќи нивното барање за 120 денари за изминат километар е нереално затоа што имаат договор со Градот Скопје што важи до мај 2025 година.