СИТЕ МЛАДИ ГЕРМАНЦИ ТРЕБА ДА СЕ ПРОЦЕНАТ ЗА ВОЕНА СЛУЖБА Мора да сме подготвени за одбрана, вели шефот на вооружените сили

Неопходно е да се изврши проценка на сите млади мажи за потенцијална воена служба, за да се избегне губење време во случај на одбранбена вонредна состојба, рече генерал Карстен Бројер, шефот на вооружените сили на Германија.

– Од воена перспектива, клучно е да се процени целата возрасна група. Само тогаш знаеме кој е достапен и кого би можеле да го повикаме во одбранбена ситуација, што се трудиме да ја спречиме – изјави Бројер.

И министерот за одбрана на Германија, Борис Писториус го поддржува националното оценување на сите млади мажи.

Бројер предупреди дека спроведувањето на проценките кога ќе настане криза би значело губење критично време.

– Никој денес не може со сигурност да каже како ќе изгледа безбедносната ситуација и заканата во наредните години – рече тој.

Според новиот закон за воена служба, кој треба да стапи во сила на 1 јануари, воената служба ќе биде доброволна. Пратениците од владејачката коалиција предложија по случаен избор да се повикуваат млади мажи за проценка, а доколку бројот на доброволци остане недоволен, подоцна ќе се воведе и задолжителна служба.

Генерал Бројер рече дека вооружените сили не треба да ги ограничуваат нивните оперативни опции.

– Доколку бројот на доброволци е недоволен и Кабинетот и Бундестагот одлучат за задолжителен повик, ние би ги избрале оние кои се најквалификувани и најмотивирани, врз основа на вистинските потреби, наместо случаен систем – појасни генералот.

Бројер ја истакна важноста на времето.

– До крајот на деценијата, потребни ни се не само силни активни сили, туку и силна резерва за да бидеме подготвени за одбрана и да ги одвратиме потенцијалните противници – истакна Бројер.