СИТЕ ЌЕ МОЖАТ ДА ПРОЧИТААТ ДАЛИ СЕ ВРШЕЛЕ НЕПОТРЕБНИ КАРДИОЛОШКИ ОПЕРАЦИИ Комисијата ги разгледува осумте случаи, вели Алиу

Комисијата што беше формирана за разјаснување на сомнежите дали се вршеле непотребни кардиохируршки интервенции веќе се состанала 3 пати и ги анализирала првите 8 пријавени случаи, изјави министерот за здравство, Азир Алиу.

Во интервју за М, Алиу вели дека на првиот состанок била договерна методологијата на работа, а на следните состаноци биле анализирани осумте случаи за кои беше доставена медицинска документација од неколку здравствени установи.

Тој нагласи дека финалниот извештај ќе биде објавен на официјалната веб-страница на Министерството за здравство.

Покрај домашната комисија, во процесот се вклучени и тројца меѓународни експерти од Словенија, Италија и од Австрија, кои се очекува физички да присуствуваат на следните состаноци.

– Извештајот на домашната комисија и оној на меѓународните експерти ќе послужат како основа за креирање на нови политики во областа на кардиологијата и на кардиохирургијата. Задачата на комисијата е да ја прикаже реалноста, а понатаму, надлежните институции ќе постапуваат согласно законот – рече министерот Алиу.