СИРИЈА ИСПРАЌА ИЛЈАДНИЦИ ВОЈНИЦИ НА ГРАНИЦАТА СО ЛИБАН Целта е да се блокира Хезболах

Сириското министерство за одбрана соопшти дека ја зајакнало својата граница со Либан, а осум сириски и либански извори наведоа дека тоа вклучува распоредување на ракетни единици и илјадници војници, додека конфликтот се шири во регионот, вклучувајќи ги и борбите меѓу Израел и Хезболах во Либан.

Изворите вклучуваат пет сириски воени офицери, сириски безбедносен функционер и двајца либански безбедносни функционери, кои дале изјави за Ројтерс под услов да останат анонимни.

Сириското министерство за одбрана во соопштение објави дека војската го зајакнала своето присуство долж сириските граници со Либан и Ирак заради „заштита и контрола на границите во услови на ескалација на регионалниот конфликт“.

Распоредените единици им припаѓаат на граничните и извидувачките баталјони задолжени за следење на граничните активности и борба против шверцувањето, додаде министерството. Сириските офицери изјавиле дека распоредувањето на дополнителните засилувања почнало во февруари, но во последните денови значително се забрзало.

Сириските и либанските вооружени сили не одговорија веднаш на барањата за коментар.

Целта на распоредувањето на дополнителните сили е да се спречи шверцувањето оружје и дрога, но и да се блокира либански Хезболах или други милитанти поддржани од Иран, истакнаа сириските офицери.

Сириските трупи беа стационирани во Либан од 1976 до 2005 година, вклучително и за време на граѓанската војна во Либан која заврши во 1990 година.