СИНОТ ТЕПАЛ ПОЛИЦАЕЦ, ТАТКОТО ФУНКЦИОНЕР ЗАБОШОТУВАЛ? Стоилковски бара обвинителството да отвори случај за директорот на БЈБ Сашо Тасевски

Син на висок полициски функционер, но и лично функционерот, можно е да се вмешани во напад врз полиција, но можно е и да влијаеле за менување на факти во записниците – истакна на прес-конференција Наум Стоилковски, портпарол на ВМРО-ДПМНЕ.

– Пред неколку дена, поточно на 3 јуни, пред една скопска дискотека, екипа на ЕБР, извршувајќи задача, фатиле група младинци во раните 20-ти години како се подготвуваат да конзумираат бела прашкаста материја, за која што подоцна, според медиумите, е утврдено дека е кокаин. Притоа, на повиците од полицијата, младинците дрско одбивале да престанат со тоа што го прават и дошло до физички напад од групата кон полицаец. Притоа, како што се наведува, еден од нив го фатил полицаецот за врат, а други го удирале со тупаници и тоа е документирано. Групата е однесена во полициска станица Карпош во 1 часот и 45 минути. И тогаш, се наведува, се заведени приведените четворица, со име и со презиме. Но кривично правниот настан, нападот е заведен дури во 6 часот и 30 минути сабајлето! И во него се споменуваат само три лица – вели Стоилковски.

Тој упати јавно прашање до МВР и го повика јавното обвинителство да го испита случајот.

– Дали при контролата и потоа за време на нападот бил присутен и синот на директорот на БЈБ Сашо Тасевски? Дали и тој во најмала рака недолично се однесувал кон полицијата? Дали веднаш тука се нашол како присутен лично и директорот на БЈБ Сашо Тасевски? Дали во периодот од 1 часот и 45 минути па се до 6 часот утрото на 3 јуни, синот и таткото, директорот на БЈБ Сашо Тасевски и синот, правеле притисок врз полицијата и полициската станица Карпош, прво, да не биде запишан синот, а потоа и да се менува записникот од листата на приведените, учесниците во нападот врз полицијата?

Зошто дури 5 часа од времето на лишување од слобода и носење во полициската станица Карпош, оставајќи доволно простор за сомневање, се прави новиот извештај и се остава простор да се мисли дека се злоупотребени полициските овластувања – праша Столковски.

Тој ги повика надлежните инстиуции да реагираат.

– Затоа бараме да постапи Јавното обвинителство за организиран криминал и корупција да има постапка, да се изврши распит и проверка на фактите на полициските службеници, да се потврдат или да се отфрлат индициите за злоупотреба на полициски овластувања од страна на директорот на БЈБ Сашо Тасевски. Ова не е прв пат името на Сашо Тасевски да е дел од скандали, и тоа да е поврзано со наркотици, пукање од недозволени автоматски оружја или пак дивеење и самоволие, а сега и со напад врз припадници од ЕБР! Со ликови како Сашо Тасевски, чија заслуга е чисто партиска, МВР станува само испостава на мафијата – рече Стоилковски.