📷 „СИНОТ ЌЕ НИ БЕШЕ ЖИВ АКО НЕ ПОСТОЕШЕ ЧЕТ ГПТ“ Вештачката интелигенција обвинета дека му помогнала на тинејџерот да се самоубие

Неколку дена откако нивниот 16-годишен син Адам си го одзел животот, Мет и Марија Рејн очајно го пребарувале неговиот мобилен телефон во потрага по причина за трагедијата. Наместо пораки на Snapchat или сомнителни пребарувања на интернет, тие нашле нешто неочекувано: транскрипти од разговори со Чет ГПТ, пренесе NBC News.

– Мислевме дека ќе најдеме преписки на Snapchat или некои чудни интернет групи, култови, не знам…“, раскажува Мет Рејн.

Од учење до „тренер за самоубиство“

Според родителите, Адам последните недели често го користел четботот како замена за друштво, доверувајќи му се за своите стравови и анксиозности. Разговорите, велат тие, покажуваат постепена промена – од помош околу домашни задачи до нешто што тие го нарекуваат „тренер за самоубиство“.

– Тој ќе беше жив ако не постоеше Чет ГПТ. Сигурен сум во тоа 100% – изјавил таткото.

Во тужба поднесена во вторник во Вишиот суд на Калифорнија во Сан Франциско, семејството го обвинува OpenAI и нејзиниот извршен директор Сем Алтман за немарност. Тие тврдат дека четботот му помогнал на Адам да истражува методи за самоубиство и дека, иако младиот човек изразил јасни намери дека „ќе го направи тоа еден ден“, системот не ја прекинал интеракцијата ниту пак активирал протокол за итни случаи.

Сочувство од OpenAI и подобрување на платформата

Портпаролот на компанијата изрази длабоко жалење за смртта на тинејџерот, додавајќи дека нивните мисли се со семејството.

Тој нагласи дека Чет ГПТ има вградени заштитни механизми кои насочуваат кон линии за помош во криза, но призна дека тие мерки се помалку ефикасни во подолги разговори.

„Заштитните алатки се најкорисни кога сите делови функционираат совршено. Ние постојано работиме на нивно подобрување“, се вели во соопштението.

OpenAI објави и блог дека планира дополнително да ја зајакне заштитата за корисници кои се наоѓаат во криза.

„Му помогна да напише порака за збогум“

Родителите собрале повеќе од 3.000 страници со транскрипти од разговорите на Адам со четботот. Во тужбата се наведува дека, наместо да се стави акцент на превенција, Чет ГПТ дури му дал и технички совети, му помогнал да состави проштална порака и го „анализирал“ неговиот план за самоубиство.

– Не му требаше некој да го советува или охрабрува. Му требаше итна интервенција. Тој беше во очајна состојба – рекол таткото.

Марија Рејн додала дека чувствува како нивниот син бил „морско прасе“ во експеримент на компанијата: „Знаеја дека постои ризик од штета, но решија дека влоговите се мали. Ете, мојот син за нив бил само мал влог“.

Овој случај го отвора прашањето за одговорноста на технолошките компании и дали досегашната правна заштита што ја имаат – како Членот 230 во САД – може или треба да важи и за вештачката интелигенција.