„СИЛЈАН“ ЈА ПРЕНЕСЕ ПРИКАЗНАТА ЗА ИСЕЛУВАЊЕТО ОД МАКЕДОНИЈА Агенцијата за филм горда на успехот на Тамара Котевска во Венеција

Претставници на Агенцијата за филм, предводени од директорот Сашко Мицевски, присуствуваа на премиерата на новиот документарен филм „Силјан“ на Тамара Котевска, во рамки на 82. Венециски филмски фестивал, во програмата Out of competition.

Филмот, кој по премиерното прикажување беше награден со долг аплауз и стоечки овации од публиката, обработува една актуелна и болна тема – иселувањето. Инспирацијата доаѓа од народната приказна за момчето Силјан кое, по кавга со татко му, се претвора во штрк и го напушта својот дом. Котевска ја претвори оваа симболика во современа приказна за судбината на источна Македонија, преку односот меѓу еден земјоделец и бел штрк.

Режисерка и продуцентка на филмот е Тамара Котевска, која самостојно го започна проектот од идеја до реализација.

„Силјан“ е копродукција со американската компанија „Конкордија“ и британската „Корнершоп“. Во продукцискиот тим се и Жан Дакар, кој е и кинематографер, Јорданчо Петковски и Ана Хашми, додека монтажата ја изработи Мартин Иванов.

Паралелно, Котевска на Венецискиот филмски маркет, кој трае до 31 август, пред финансиери и дистрибутери ќе го претстави својот нов документарен филм „Мамутите кои избегаа од царството на Елрих хан“, снимен во Сибир. Проектот отвора прашања за опстанокот на сибирското шаманско племе Долгани и судирот меѓу одгледувачите на ирваси и ископувачите на мамутски заби – на последната точка од северот на планетата каде што сè уште има траги од цивилизација.

Агенцијата за филм изрази гордост за успехот на Котевска на меѓународната сцена и потсети дека таа летово го заврши снимањето на својот прв долгометражен игран филм „Човек против јато“, кој е финансиран од Агенцијата.