СИЉАНОВСКА-ДАВКОВА ВЧЕРА ГО ПОМИЛУВА, ПОЛИЦИЈАТА ДЕНЕСКА ГО ПРИВЕДЕ Акиф Равмановски ќе одговара за обид за убиство
Вештачењата за присуство на барутни честички кои беа извршени по наредба на јавниот обвинител ги потврдија првичните сознанија дека сега осомничениот со огнено оружје – пиштол испукал неколку истрели во правец на оштетениот со умисла да го лиши од живот и му нанел прострелна рана во пределот на ногата, информираше Јавното обвинителство.
Не помина ниту еден ден откако беше помилуван од претседателката Гордана Сиљановска Давкова, а Акиф Равмановски кого медиумите го поврзуваат со нарко-кланот „Барон“, денеска повторно е уапсен за обид за убиство.
„По наредба на јавен обвинител од Основното јавно обвинителство Скопје, полициски службеници од Министерството за внатрешни работи денеска непосредно по излегувањето од КПУ ‘Идризово’ – Скопје лишија од слобода лице на кое со Одлука на Претседателот на Република Северна Македонија извршувањето на изречената казна затвор му беше заменето со условна осуда, бидејќи за истото лице е поведена истрага за ново кривично дело – Убиство од член 123 во врска со член 19 (во обид) од Кривичниот законик. За лицето се водеше претходна постапка во врска со оружениот инцидент кој се случи на 14 октомври на булеварот Христијан Тодоровски Карпош во Чаир. Вештачењата за присуство на барутни честички кои беа извршени по наредба на јавниот обвинител ги потврдија првичните сознанија дека сега осомничениот со огнено оружје – пиштол испукал неколку истрели во правец на оштетениот со умисла да го лиши од живот и му нанел прострелна рана во пределот на ногата. Веднаш по пристигнување на вештиот наод, денеска е донесена Наредба за истрага на осомничениот, а до судија на претходна постапка од Основниот кривичен суд Скопје ќе биде доставен предлог за определување мерка притвор“, наведено е во соопштението на Јавното обвинителство.
За истиот настан, посочено е таму, по поднесена кривична пријава од Министерството за внатрешни работи против три лица, Основното јавно обвинителство Скопје за нив поведе постапка за кривично дело – Учество во тепачка од член 132 став 1 од Кривичниот законик.
Потврда за приведувањето пристигна и од МВР:
„Денеска (24.10.2024) во Скопје полициски службеници од СВР Скопје, го лишија од слобода А.Р. (29) од с.Арачиново во врска со кривично правен настан случен на 14.10.2024 на територија на Чаир, каде што од огнено оружје бил повреден Е.А. (35) од Скопје. По преземени мерки и активности и изготвените вештачења од страна на Одделот за форензички испитувања при МВР, утврдено е дека сторител е А.Р. и од страна на Единицата за насилен криминал при СВР Скопје во координација со ОЈО Скопје денеска (24.10.2024) поднесена е кривична пријава по брза постапка против А.Р. за кривично дело ‘убиство’, предвидено и казниво по член 123 во врска со член 19 од Кривичниот законик.