ШВАРЦЕНЕГЕР ГИ ВООДУШЕВИ СТУДЕНТИТЕ ГОВОРЕЈЌИ ЗА ЧАРЛИ КИРК Актерот е вознемирен што во САД се убива за различно мислење

Холивудската ѕвезда и поранешен републикански политичар се обрати пред студентите на Универзитетот во Јужна Калифорнија, нагласувајќи дека е длабоко вознемирен од фактот дека некој го загубил животот само затоа што имал различно мислење.

Шварценегер ја обвини смртта на Кирк, за која се сомнева дека ја извршил Тајлер Робинсон, за поделбите што, како што вели тој, се поттикнати од социјалните медиуми, мејнстрим медиумите и од политичарите од двете големи партии во САД.

Легендата од „Терминатор“ и поранешен гувернер на Калифорнија од редовите на Републиканците, задржа тивок тон, но порача:

– Демократијата не умира со куршум, умира со молк – рече Шварценегер, алудирајќи на убиството на Кирк за кое е осомничен Тајлер Робинсон.

Холивудската легенда ги повика студентите со спротивставени политички погледи да најдат заеднички јазик.

– Замислете да се соберете и да разговарате едни со други. Ќе станете пример за сите универзитети, ќе покажете како не ја гледате другата страна како непријател, како не објавувате војна еден на друг – изјави Шварценегер, добивајќи аплауз од околу 500 студенти.

Потоа глумецот се обрати и преку своите социјални мрежи: „Има нешто поважно во ова видео од мојата порака. Тоа е она што не го слушате. Без навреди. Без непочитување. Без викање.“

Според Шварценегер, „моќта на народот е врвна моќ; тоа е вистинската дефиниција за демократија“.

„Знам дека социјалните медиуми често ни го покажуваат најлошото од човештвото… Не дозволувајте тие компании и влијателни луѓе, кои заработуваат од гневот, да ве убедат дека најлошите се мнозинство“, објави Шварценегер на интернет.

Актерот го пофали и начинот на кој публиката реагирала на неговите зборови:

„Никој не викаше. Никој не прекина. Само слушаа. Ако сте изгубени во вревата на интернетот, излезете надвор и најдете ја вашата човечност“.