Швајцарија има тешка ситуација, но не воведува мерки: „Без заклучување, без паника“

Состојбата на заболени со ковид-19 во Швајцарија е тешка. Во последните седум дена биле пријавени 351 новозаболени на 100.000 жители, а во Германија имало помалку од 140 новозаболени на 100.000 жители во истиот период. Од почетокот на пандемијата, 41 лице починало на 100.000 жители во Швајцарија, а 16 лица во Германија. Швајцарија е на самиот врв во Европа.

Политиката, властите и општеството реагираат на сè на опуштен начин. На многу места, баровите, рестораните и кината сè уште се отворени, пазарите се преполни, во објектите за игри на среќа луѓето се коцкаат, во теретаните се вежба, а отворени се и борделите.

На 1 октомври, федералната влада го укина барањето да се дозволат максимум 1.000 гледачи на поголемите настани. Започна пред-Божиќното тргување во трговските центри низ целата земја. По тој повод, беше организирана наградна игра во еден трговски центар, каде што стотици луѓе се протуркаа заедно да се обидат да добијат билет за лотарија.

„Штедливоста е поважна за Швајцарија од животот“, беше еден од насловите во американското списание „Foreign Policy“. Автор е швајцарскиот историчар Џозеф де Век. Тој е згрозен од изјавата на министерот за финансии Ули Маурер, кој рече дека Швајцарија не може да си дозволи втора блокада.

– Тој покажа дека е сосема во ред Швајцарија да разговара за она што е поважно, здравјето или парите – изјави тој за телевизијата „SRF“.

Тој на 10 ноември рече дека научниците гледаат само здравје, но и дека мора да се заработат пари. Така што би морале кантоните да работат. Федерализмот е многу важен во Швајцарија. Кантоните своите надлежности ги бранат со сите средства, а воздржани беа само на почетокот на пандемијата.

Во пролетта, федералната влада потоа ги презеде работите во свои раце и ги затвори сите продавници, клубови и ресторани за четири недели. Но, откако ситуацијата малку се подобри, кризниот штаб беше распуштен во јуни и одговорноста беше препуштена на кантоните.

Драматична состојба во Женева, воведени локални мерки

Во октомври, бројот на новозаболени експлодираше, и покрај неколку недели предупредувања од научниците. Десетици економисти на почетокот на ноември напишаа отворено писмо: – Колку и да е тешко и колку и да е болно, на Швајцарија и треба второ заклучување, поврзано со обемни мерки за фискална поддршка, за да се отстранат понатамошните штети предизвикани од пандемијата од ковид-19.

Во кантонот Женева, ситуацијата е скоро надвор од контрола со значително повеќе од 1.000 случаи на 100.000 жители. Толку лоша состојба немаше во ниту еден регион во Европа.

На почетокот на ноември, кантоналната влада одговори со мерки за затворање: сите продавници, сите услуги и ресторани беа затворени. Како резултат на тоа, жителите на кантонот Женева делумно се движат уште повеќе, на пример да одат на фризер во соседниот кантон Ваадт. Другите кантони исто така воведоа ограничувачки мерки. Оваа недела градот Базел исто така затвора ресторани, барови, кафулиња, спортски сали, лизгалишта, базени и казина.

Светската здравствена организација е зачудена

Федералната здравствена установа останува опуштена.

– Развојот ме прави претпазлив оптимист, се чини дека трендот се менува – изјави шефот на здравствената установа Ана Леви за весникот „Sonntagsblick“. Инциденцата за седум дена се намали од повеќе од 450 на 100.000 жители (од 9 до 15 ноември) за една недела на околу 350 нови инфекции. Но, сметајќи на 14 дена, Швајцарија е на врвот во Западна Европа според бројот на нови инфекции, пред Италија, Велика Британија и Франција.

– Ние не сме значително полоши од другите европски земји – сепак тврди Леви.

Дејвид Набаро, комесар на СЗО за ковид-19, со седиште во Женева, не може да поверува дека швајцарските власти се однесуваат на ваков начин.

– Ме изненадува тоа што ова не се третира како состојба на национална катастрофа – рече тој за весникот на медиумската компанија „CH-Media“.

Но, весникот „Neue Zürcher Zeitung“ зборува со почит за швајцарската стратегија.

– Нема заклучување, нема паника – Бундесратот (швајцарска влада) внимателно се справува со корона-стресот. Ако мнозинството од населението е опуштено како Бундесратот, тогаш сè ќе заврши добро – пишува весникот во коментар.