ШТО Е СО ВЛАДИНИОТ АВИОН KOJ НОНСТОП СЕ РАСИПУВА? Леталото било злоупотребено од поранешните функционери

„Владиниот авион го затекнавме таков каков што е. Тој е стар 20 години. Досега се потрошени над три милиони евра за сервисирање. Дефектите се многу чести и ако јас се прашувам, ако претендираме да бидеме сериозна држава, ни треба државен авион кој ќе го користат сите министри, претседателот на Собрание, претседателот на државата“.

Ова го изјави директорот на Службата за општи и заеднички работи, Ивица Томовски. Тој во интервјуто за „Република” објаснува зошто е потребно да се купи нов владин авион.

– Сега авионот е во возна состојба, променет е инструменот за мерење издувни гасови. Овој авион е премал, има само 6 седишта и не ги задоволува потребите за државата бидејќи кога се оди на некое патување, се оди со цела делегација. Потребен ни е авион со 14 и повеќе седишта. Сѐ уште немаме проценка колку би чинел бидејќи за тоа е потребен консензус меѓу власта и опозицијата бидејќи тој ќе биде за државните потреби – изјави Томовски.

Томовски потсетува и на злоупотребите кои се правеле при користењето на ова летало.

– Најчесто го користелe Маричиќ, Бујар Османи и поранешниот претседател на Собранието, Талат Џафери. Маричиќ сакаше да го употреби авионот до Ниш иако е побрзо и поекономично да отидете со автомобил. Класична злоупотреба имаше и од Џафери. Тој авионот од сервис во Нирнберг го врати во Македонија само поради неговите лични хирови. Иако тој се обиде да демантира, јас го повикав Јавното обвинителство да провери – додава министерот.

Тој најави дека надлежните од неговото министерство почнале со ревизија.

– Сето она, што ќе го најдеме како злоупотреба, ќе го предадеме во Јавното обвинителство, полицијата и финансиска полиција и тие се надлежни да постапуваат понатаму.

Томовски вели дека има поддршка од премиерот и од другите интитуции за промена на регистарските таблички на службените возила кои во иднина ќе бидат со цврвена и жолта боја и ќе бидат лесно воочливи за граѓаните кои ќе можат да ги пријават ако се користат надвор од работното време.

Во прилог, целосното интервју за Република кое можете да го проследите тука.