ШТО ЌЕ СЕ СЛУЧИ СО ЗАКОНОТ ЗА РАБОТНИ ОДНОСИ? Се дебатира дали да се менува или да се носи нов закон
Актуелниот Закон за работни односи е нефункционален бидејќи од 2005 година кога е донесен до сега има 28 измени и дополнувања.
Реформата на трудовото законодавство не е само технички процес, туку одлука за насоката што треба да ја заземе пазарот на трудот во нашата земја, изјави министерот за економија и труд Бесар Дурмиши на денешната конференцијата „Реформа на Законот за работни односи – предизвици и насоки“ на која присуствуваа претставници на синдикатите, работодавачите, на меѓународните организации и експертите од областа.
Дебатата треба да ѝ помогне на владата да одлучи што ќе прави со Законот за работни односи кој е нефункционален бидејќи од 2005 година кога е донесен до сега има 28 измени и дополнувања.
– Многуте измени придонесоа за тешко следење на законот. Тој не ги следи брзите промени на пазарот на трудот, а детектирани се и многу одредби кои поради својата нејасност придонесуваат за правна несигурност – рече Дурмиши.
Тој посочи дека современите предизвици бараат јасен правен систем – флексибилен за работодавачите, правичен за работниците и функционален за државата.
-Ниту една реформа не е лесна, но нема успех без храброст, партнерство и заедничка визија. Ова е наша заедничка можност да изградиме силна основа за идните генерации – рече Дурмиши.
Дурмиши рече дека цел на денешната конференција е да се слушнат социјалните партнери, судиите, експертите и другите засегнати страни за тоа дали е подобро да се оди на измени на постојното законско решение или да се работи на текстот на нов закон кој се работи подолг период.