Што би сториле ако сега ја снема короната? „Ќе ги изнагушкам родителите, се надевам дека и децата ќе ми дојдат да ме гушнат мене“

Замислете, утре се будите од спиење и дознавате дека повеќе нема ковид-19, а тоа значи дека повеќе не се потребни маски, средства за дезинфекција, ограничувања, протоколи. Што најпрво би направиле?

Ова прашање им беше поставено на корисниците на социјалните мрежи ширум земјава, а свој одговор дадоа над 600 луѓе. Во коментарите најчесто можат да се прочитаат емотивни одговори: „Ќе си ги гушнам баба и дедо најсилно на цел свет, оти ги немам гушнато уште од април“. Има и такви кои велат дека уште истиот ден би го подготвиле куферот и би отпатувале некаде далеку: „Купувам авионски билети, дестинацијата не ми е важна“. И, секако, има и смешни коментари: „Пак на раат ќе ги лижам шипките во автобусите на ЈСП“.

Во продолжение, ви пренесуваме дел од коментарите кои заслужуваат да бидат објавени:

„Би седнала во кафана со друштвото и би славела три родендени, бидејќи за сите бевме во карантин, а потоа ќе плачам од среќа!“

„Би му благодарел на Бога“.

„Цел ден ќе бидам весела и среќна заради следните денови во кои повторно ќе бидам во близина со сите кои ги сакам“.

„Кафана од сабајле до другиот ден сабајле“.

„Тогаш на раат ќе го изнесам детето во парк и на лулашки да се изнаигра со другите дечиња, без да се плашам што ќе чепне и дали ќе ги стави рачињата во уста“.

„Ќе си се собереме во Градскиот парк на сепариња со цело друштво што не сме се виделе со месеци. Ќе си се изнагушкаме, ќе си ги земеме децата да ни играат во тревата позади сепарињата, ќе се изнамуабетиме без дистанца и маска и ќе наздравиме со грч ладно пиво“.

„Ќе ги изнагушкам родителите, се надевам дека и децата ќе ми дојдат да ме гушнат и мене“.

„Ќе отпатувам во Кина. Или било каде на друго место“.

„Ќе ги гушнеме полицајците што ни напишаа казни за неносење маска“.

„Ќе кивам низ Центар“.

„Ќе одам со Венко и Лиде на кафе“.

„Во игротека ќе уплатам полн пансион 24/7“.

„Ќе изгасам мешалицата и ќе зберам кабело“.

„Ќе си купам фустан за по свадби, оти сигурно ќе ги има многу“.