ШТЕДЕТЕ ВОДА ВО БАЗЕНИТЕ, ЌЕ НЕМА ЗА ПИЕЊЕ Рационално со водата, пријавувајте диви приклучоци

Врз основа на податоците на Управата за хидрометеоролошки работи, од каде се најавуваат високи температури кои деновиве достигнуваат и над 40 степени, како и од податоците  на ЈП Водовод и канализација – Скопје за зголемена потрошувачка на водата, јавното претпријатие упати апел до граѓаните на Скопје за рационално користење и употреба на водата.

„Особено апелираме да се избегнува непотребно трошење на водата за полевање на зеленило, бавчи и ниви, за перење автомобили, за полнење на базени, но и за спречување на злоупотребата преку дивите приклучоци. Со дивите приклучоци се нанесува директна штета на системот за водоснабдување и на квалитетот на водоснадбувањето до сите корисници во град Скопје“, се вели во соопштението.

Се апелира до граѓаните на град Скопје, доколку забележат див приклучок, да го пријават на 023073 010, [email protected], www.vodovod-skopje.com.mk или преку мобилната апликација достапна за Android и iOS. Дивите приклучоци се забранети со Закон (Закон за вода за пиење и одведување урбани отпадни води, член 23) и истите се утврдуваат од страна на овластен комунален инспектор на општината и на Градот (Закон за вода за пиење и одведување урбани отпадни води, член 37), врз основа на што за сите утврдени иматели на див приклучок ќе биде покрената прекршочна постапка за сторено кривично дело.