Штедачи: Костовски вели едно, а фактите говорат друго за пропаѓањето на Еуростандард банка

Оштетените штедачи на Еуростандард банка тврдат дека нивните заштеди  отишле на ненаплативи  кредити на 149 фирми  меѓу кои се и фирми со звучни имиња, кои не платиле ниту една рата и со години за што се виновни раководството на Еуростандард банка сопствениците на фирмите и Народната банка која не реагирала навреме да ги заштити нивните пари.

„Сумарно, едни одобрувале ненаплатливи кредити, други ги земале и ги делеле понатаму, а трети ги толерирале и аминувале овие криминални зделки. Едните се раководните лица во ограбената Еуростандард банка, Трифун и Коста Костовски и директорот на банката Николче Петкоски, другите поединци и сопственици на избрани фирми каде завршувале парите и биле поделени соодветно по заслуга и претходен договор, и третите се гувернерката Анита Ангеловска Бежоска и нејзинот прв тим од Народна банка кои слепо гледале, молчеле, го дозволиле и учествувале во сторениот криминал“, стои во денешното соопштение.

Тие се повикуваат на последниот извештајот од стечајниот управник  на банката Душко Тодевски во кој е констатирано дека:

•  Нецелосна усогласеност на Банката со интерните политики и процедури за кредитен ризик, како и со Одлуката за управување со кредитен ризик.
• Системот за мерење на загуби од кредитен ризик е оценет како слаб.  Утврдено е неприменување на одредбите на одлуката за управување со кредитен ризик и тоа кај масовен дел од портфолиото на правни лица.
• Пракса на масовно одобрување на кредити за измирување на достасани обврски во Банката.
• Непрепознавање на ризикот од концентрација кај поединечен клиент и со него поврзани лица.
•   Банката преземала поголем кредитен ризик кај клиентите кај кои одобрила изложеност покриена единствено со меница или пак вредноста на обезбедувањето е пониска од изложеноста на клиентот.
• Банката одобрувала изложености иако истите не ги исполнувале критериумите за одобрување дефинирани во Кредитната политика.
• Банката имала значителни слабости во воспоставениот систем за наменско користење на средствата од одобрените кредити.
• Утврдени биле слабости во системот на индикатори за рано предупредување.

Според оштетените штедачи, главна основа на овој организиран криминал се 149 фирми кои земале ненаплатливи кредити.

„Од овие фирми нема што да се наплати бидејќи немале адекватно обезбедување ниту биле бонитетни да земат така големи кредити. Многу од нив се веќе или затворени, во стечај или се пред затворање. Имаат големи долгови, многукратно поголеми од нивниот капитал и резерви. Едноставно, делени се кредити за да не се вратат. И сето тоа се случувало под будното око на Народната банка и гувернерката Бежоска кои го дозволиле овој масовен криминал на нашите депозити“, стои во соопштението.

Штедачите тврдат дека главниот водач на криминалната банда од ограбената банка, Трифун Костовски, ја манипулира јавноста и штедачите.

„Преку медиумите самошто најави негово јавно објавување на криминалните шеми кои ги правеле во банката и предупреди дека тоа може да биде штетно за иднината на државата. Прашање е колку може да му се верува на криминалец од таков калибар како Трифун Костовски, позади кој досега има повеќе изречени лаги и контрадикторности. Прво, тој јавно изјавуваше дека е виновен и одговорен за сторениот криминал, потоа тврдеше дека нема никаква вина, за да последно јавно изјави дека направил кривично дело во процесот на докапитализацијата на банката во 2019 година. На почеток, тврдеше дека ќе има пари да се обештетат во целост од стечајната маса сите оштетени граѓани и фирми депоненти во банката за не повеќе од една година, за да потоа изјави дека криминалот не е 60 милиони евра туку 120 милиони евра. Фактите се едни, а приказните се други. Дали ќе слушнеме повторно приказни од главниот криминалец или навистина ќе дознаеме нешто повеќе за тоа како ја покрале банката тој и неговите бандити, останува да видиме во многу скоро време. Тоа може и ќе помогне да што поскоро целосно се расветли организираниот криминал во Еуростандард банка и да ни се вратат украдените пари додека криминалците заслужено бидат упатени на отслужување на долгогодишни затворски казни“, стои во соопштението..

Оштетените штедачи најавуваат дека ќе објават приказни за фирмите кои зеле кредити меѓу кои, како што велат има звучни имиња.

„ Со тоа веруваме дека ќе помогнеме во расветлување на овој организиран криминал и корупција, коишто и по седум месеци продолжуваат да се толерираат и да се премолчуваат од надлежните институции, за да се запосзнае пошироката јавност со нивото на криминалот и корупцијата во банкарскиот сектор, поддржани од банкарската мафија и толерирани од државата“, стои во најавата.