ШИЛЕГОВ ТВРДИ ДЕКА Е ИЗЕДНАЧЕН СО АРСОВСКА Тој се надева на победа поради коалицискиот капацитет што го има

Јас како и секогаш се потпирам на гласовите на граѓаните, одговори актуелниот градоначалник Петре Шилегов на новинарско прашање, дали и на чии гласови се надева во вториот круг, дали на Камиказа, на Бени Шаќири или на Ана Петровска.

– Вчера имавме успешен ден и празник на демократијата, им честитам на сите кандидати за резултатот во првиот круг и на граѓаните кои излегоа на гласање – рече актуелниот прв човек на Скопје.

Шилегов им се заблагодари на граѓаните кои гласаа во првиот изборен круг и порача дека во вториот круг со противкандидатката влегуваат изедначено.

– Скопје мора да продолжи напред и јас силно верувам дека скопјани во вториот круг ќе излезат во поголем број и ќе дадат поддршка за политиките што Скопје за четири години целосно го променија – изјави Шилегов.

Тој се пофали дека како градоначалник има реализирано голем број проекти во интерес на граѓаните, како и дека се решени и се решаваат децениски проблеми напластени во градот, како и дека работеле за сите граѓани подеднакво и Скопје конечно стана единствен град.

– Ги повикувам сите граѓани кои од одредени причини не излегоа на гласање во вториот круг масовно да излезат и да гласаат. Јас сум убеден дека поради ова, како и поради поголемиот коалициски капацитет во вториот изборен круг ќе извојуваме голема победа – рече Шилегов на денешната прес-конференција.

Одговарајќи на новинарско прашање дали треба уште во првиот круг да и ја честита победата на кандидатката Данела Арсовска поради тоа што таа има сериозна предност, Шилегов одговори:

– Госпоѓа Арсовска е поддржана од ВМРО-ДПМНЕ и ААА, а по анализа на резултатите таа го достигна истиот резултат што ВМРО-ДПМНЕ го имаше во Скопје на парламентарните избори. Коалицискиот капацитет што го имам јас, бидејќи е со граѓаните е многу поголем и поуспешен и верувам во победа во вториот круг од изборите.