ШИЛЕГОВ ПОЧНА СО УРИВАЊЕ НА ЕДНА ОД ГАЛИИТЕ Опозицијата чека тој да ја урне и својата зграда
Четири години е градоначалник и две работи по кои ќе биде запамтен е рушење на галијата и засадување на едно сиромашно дрво, велат од ВМРО-ДПМНЕ.
Првата од 3-те галии во коритото на Вардар, почна да заминува во историјата, објави градоначалникот на Скопје, Петре Шилегов на Фејсбук.
„Скопје, една поинаква приказна“ напиша Шилегов, објавувајќи повеќе фотографии од галијата која се урива во моментов.
ВМРО-ДПМНЕ експресно реагира дека уривањето на галијата е чист предизборен маркетинг на Шилегов и додава оти се надева дека рушењето ќе продолжи и со неговата зграда дивоградба во скопски Карпош
– Четири години е градоначалник и две работи по кои ќе биде запамтен е рушење на галијата и засадување на едно сиромашно дрво. А само да потсетиме дека на скопјани им ветуваше подземен тунел под Кале, нови булевари, мостови и паркови. Третата работа којашто е поврзана со градење, а го има печатот на Петре Шилегов е зградата дивоградба којашто ја изгради во време на неговиот мандат во скопски Карпош – велат од ВМРО-ДПМНЕ.