Шекеринска има привремен НАТО сертификат, чека да добие нов

Министерката за одбрана, Радмила Шекеринска, има времен НАТО безбедносен сертификат, но во завршна фаза е процедурата за издавање нов НАТО сертификат, изјавија за Плусинфо од Министерството за одбрана (МО).

– Министерката за одбрана има времен НАТО безбедносен сертификат со кој учествува на сите состаноци на Северноатлантскиот Совет во формат на министри за одбрана и има пристап до сите информации неопходни за министер за одбрана на земја членка на НАТО. Во завршна фаза е процедурата за издавање нов НАТО безбедносен сертификат – објаснуваат од МО.

Опозициската ВМРО-ДПМНЕ деновиве обвини дека двајца министри, првиот човек на МВР, Оливер Спасовски, и на правда, Бојан Маричиќ, не поседуваат безбедносен НАТО сертификат, а денеска, преку ново партиско соопштение беше наведено дека и други функционери не го добиле сертификатот.

Спасовски негираше и истакна дека тој има безбедносен сертрификат од највисоко ниво на доверливост во државата и дека во тек е постапката на добивањето на НАТО безбедносниот сертификат, додека, пак, од владата соопштија дека министерот Маричиќ воопшто и нема потреба од таков сертификат.

Инаку, најголем дел од функционерите кои треба да добијат сертификати од НАТО се вработени во Министерството за одбрана, односно во Армијата на Република Северна Македонија и во Министерството за надворешни работи. Таков сертификат им следува и на оние лица кои учествуваат во нашата делегација во НАТО, односно работат на прашањата поврзани со НАТО, а тука влегуваат и безбедносните и разузнавачките структури.