ШАМПИОНОТ СЕ ПЛАСИРАШЕ ВО СЛЕДНОТО КОЛО Хет-трик на Радески во победата над Будуќност

Фудбалерите на македонскиот шампион Струга Трим Љум вторпат го победија Будуќност, овојпат со 3-4 (2-2) и се пласираа во третото претколо во Конференциската лига на УЕФА. Во навистина ефикасен натпревар на „Градскиот стадион“ во Подгорица, стружани беа подобри, заслужено победија и одат во следната фаза на натпреварувањето.

Шпетим Дуро се реши за само една измена во однос на првиот меч во Охрид. Од стартот на мечот наместо Таири кој беше стартер минатиот пат, настапи Згуро. Екипите влегоа во средбата со „отворен гард“, а по само седум минути Будуќност поведе. Корнер по десната напаѓачка страна изведе Гашевиќ, а одлично во шеснаесетникот се снајде Ѓуричковиќ кој ефектно со пета го матира Ведран Ќосевски за 1-0 во седмата минута.

Сепак, бргу стружани дојдоа до израмнување, бидејќи веќе во 11. стрела Марјан Радески. Мазрекај изведе удар од аголот, а македонскиот репрезентативец со глава погоди за 1-1. По постигнатиот погодок, пех за стружани беше повредата на Мазрекај, по што Дуро мораше да менува и го уфрли Укпа.

Темпото на игра малку се намали, екипите играа главно на средината од теренот, но кога сите очекуваа пауза и полувреме, паднаа два погодоци. Марјан Радески го комплетира пресвртот, откако во брза контра доби топка од Укпа и со пласиран удар од надвор од шеснаесетникот погоди за 1-2 во третата минута од судиското продолжение.

Ниту тоа не беше сè во првиот дел. Длабоко во дополнувањето, дури во деветтата минута Будуќност дојде до израмнување. Незири направи фаул на околу 20 метри од голот, а 17-годишниот црногорски талент Василије Аџиќ го префрли живиот ѕид и биеше неодбранливо за Ќосевски за 2-2.

Во продолжението црногорскиот тренер се обиде да освежи со Мрваљевиќ, ама Будуќност не успеваше да се наметне. Напротив, во 66. минута Струга пак поведе во Подгорица. Погодокот беше целосна заслуга на Бесарт Ибраими, кој доби топка на околу 30 метри, повлече и дојде во зоната на шут, па стрела за 2-3.

До крајот на мечот темпото на игра опадна, Будуќност беше апсолутно инфериорен, додека Струга беше разиграна. Тоа резултира со четврти погодок во домашната мрежа. Својот хет-трик го комплетира Марјан Радески, откако по една чудна акција која ја начна Шабани, дојде до голот за 2-4. Ниту тука не беше крајот на возбудувањата, за ублажување на поразот погоди Секуловиќ во 82. минута, поставувајќи ги конечните 3-4.

Следен противник на Струга ќе биде екипата на Хесперанж од Луксембург, кој го доби двомечот со велшки ТНС.