СЀ ЗАВИСИ ОД КИНА И ОД ЗИМАТА Енергијата може да биде скапа и оваа зима
Бирол оцени дека многу европски влади направиле „стратешки грешки“, вклучително и преголема зависност од Русија и дека надворешната политика е „заслепена“ со краткорочни деловни одлуки.
Цените на енергијата би можеле повторно да пораснат оваа зима, предупреди денеска шефот на Меѓународната агенција за енергетика (ИЕА), Фатих Бирол.
– Доколку се реализира сценарио во кое кинеската економија е многу силна и купува многу енергија на пазарот, а во исто време зимата е тешка, можно е да се зголеми цената на природниот гас, што дополнително ќе ги оптоварува потрошувачите – рече Бирол во интервју за Би би си.
Тој рече дека владите треба да штедат енергија и да поттикнуваат добивање енергија од обновливи извори.
Бирол оцени дека многу европски влади направиле „стратешки грешки“, вклучително и преголема зависност од Русија и дека надворешната политика е „заслепена“ со краткорочни деловни одлуки.
Тој се осврна и на климатските цели на светските влади, нагласувајќи ја важноста од намалување на потрошувачката на енергија.
– Доколку светот е сериозен во борбата против последиците од климатските промени, ќе мораме значително да ја намалиме потрошувачката на нафта и гас во наредните години – рече шефот на ИЕА.
Според него, доколку се намали потрошувачката, постојните наоѓалишта на нафта и гас ќе бидат доволни за да се задоволи побарувачката за овие извори на енергија.