СЕ РАСЧИСТИЈА МИСТЕРИИТЕ, СЛУШНАВМЕ ДЕКА АЛЕКСАНДАР НЕ БИЛ ИНВОЛВИРАН ВО КРИВИЧНОТО ДЕЛО Адвокатот Туфегџиќ забележал разлики во исказите на Зорица

Многу важен е денешниот исказ на мајката на Вања Ѓорчевска, Зорица Ѓорчевска, затоа што конечно се расчистија сите шпекулации и мистерии кои се провлекуваа во јавноста во изминатиот период. Исказот на Зорица само ја потврди тезата на одбраната дека мојот клиент Алексадар Ѓорчевски нема никаква инволвираност во кривичното дело.

Ова го изјави Владимир Туфегџиќ, адвокат на Александар Ѓорчевски, веднаш по завршувањето на денешното судско рочиште на коешто сведочеше Зорица Ѓорчевска.

– Сите го слушавте исказот, па веројатно забележавте дека самиот сведок не посочи дека Александар направил нешто невообичаено или нешто што нормален обичен човек не би направил во таков момент. Во однос на тоа што Александар дал своја претпоставка дека девојчето е киднапирано, ако внимателно го слушавте сведокот, и самата Зорица појасни како го толкува неговото толкување дека Вања е киднапирана. Александар не можел да се помири со фактот дека нејзиното дете побегнало, па затоа тој претпоставувал дека Вања е киднапирана. Сите биле вознемирени, сите биле насочени кон тоа да го пронајдат детето – рече адвокатот.

Овој денешен исказ на сведокот, додаде Туфегџиќ, се разликува од исказот што го дала Зорица Ѓорчевска во Обвинителството.

– Имав прилика да имам увид во нејзиниот исказ во Обвинителството, а во некои клучни точки се отстапува од тоа што денеска го слушнавме во судницата. Но, денеска сведокот беше дециден и работите станаа многу појасни. На пример, таа тогаш изјавила дека Александар секогаш доцни, па чудно ѝ било како стигнал навреме пред зградата. Ама денеска таа објасни дека не било тоа баш така. Во таква ситуација човек не размислува, туку веднаш се облекува и трча по скалите за да стигне навреме – рече Туфегџиќ.