Се предлага карантин за Задушница во Скопје, Штип, Куманово и Тетово

Комисијата за заразни болести на денешниот состанок донесе предлог да биде воведен полициски час во Скопје, Штип, Куманово со Липково и Тетово, како и Боговиње, Брвеница, Теарце, Желино и Јегуновце од утре во 21 часот до понеделник наутро во 05 часот.

Во останатите градови се предлага полицискиот час да биде од 16 часот до 5 часот наутро, секој ден.

Предлогот на Комисијата ќе биде доставен до владата и Кризниот штаб за утврдување на следните чекори на делување.

Дополнително на состанокот, на претставниците на Министерството за внатрешни работи им беа укажани потешкотиите со кои се соочуваат екипите на терен во однос на пристап до луѓе за тестирање и прекршувања на мерката за самоизолација. Од службите на МВР беше побарана поголема ажурност, ефективно делување на терен, контрола и санкционирање на прекршувањата на мерките.

На состаникот, кој го свика министерот за здравство Венко Филипче беа присутни членовите на Комисијата за заразни болести, претставници на локални Центри за јавно здравје и претставници на Министерството за внатрешни работи.